សារព័ត៌មាន នគរវត្ត តែងតែនាំមុខគេជានិច្ច
ជើងហោះហើរក្រុមហ៊ុនអាកាសចរណ៍កាណាដា (Air Canda Boeing 767) ផ្ទុកដំណើរ១២៨នាក់ និងអាកាសយានិក៨នាក់ កាលពីថ្ងៃទី៣ ខែកុម្ភៈ ឆ្នាំ២០២០ ខណៈកំពុងហោះហើរស្រាប់តែម៉ាស៊ីនលេចបញ្ហាមិនប្រក្រតី ជាហេតុនាំឲ្យវិលត្រឡប់ក្រោយចុះចតបន្ទាន់វិញ។
អ្នកដំណើរនាំគ្នាជ្រួលច្របល់ភ័យបះសក់ច្រូងគ្រប់គ្នា នៅពេលដឹងថា យន្តហោះបែរក្បាលត្រឡប់ក្រោយមកចុះចតនៅអាកាសយានដ្ឋានអន្តរជាតិទីក្រុងម៉ាឌ្រីត ប្រទេសអេស្ប៉ាញវិញ ។ ប៉ុន្តែយ៉ាងណាក៏ដោយ ជាភព្វសំណាង យន្តហោះបានចុះចតប្រកដោយសុវត្ថិភាព ហើយអ្នកដំណើរត្រូវបានជម្លៀសប្រកបដោយសុវត្ថិភាពគ្រប់ៗគ្នា ។
ប្រភពរ៉យទ័របានផ្សាយថា យន្តហោះ Boeing Co 767-300ER នេះបានហោះហើរចាកចេញពីអាកាសយានដ្ឋាន Adolfo Suarez Madrid-Barajas ទីក្រុងម៉ាដ្រីត ប្រទេសអេស្ប៉ាញ ទៅកាន់ទីក្រុង តូរ៉ុនតូ ប្រទេសកាណាដា បានប្រហែល៤ម៉ោង ក៏បានវិលត្រឡប់មកចុះចតបន្ទាន់នៅអាកាសយានដ្ឋានដដែលវិញ ក្រោយពីអាកាសយានិកបានដឹងថា ម៉ាស៊ីនយន្តហោះហាក់កំពុងតែមានបញ្ហា មិនអាចបន្តដំណើរឆ្ពោះទៅមុខទៀតបាននោះ ។
ប្រតិបត្តិករអាកាសយានដ្ឋានទីក្រុងម៉ាដ្រីតបានបញ្ជាក់ថា «យន្តហោះបានចុះចតប្រកបដោយសុវត្ថិភាព ហើយបញ្ហានោះបាននិងកំពុងធ្វើវិភាគ ត្រួតពិនិត្យ លក្ខណៈស្ថានភាពរបស់វា ដោយប្រកាន់ខ្ជប់នូវសុវត្ថិភាពជាចម្បងបំផុតដល់អ្នកដំណើរ» ។
រដ្ឋមន្ត្រីក្រសួងដឹកជញ្ជូនអេស្ប៉ាញ Jose Luis Abalos បានអរគុណដល់អាកាសយានិកដែលបានចុះចតយន្តហោះប្រកបដោយសុវត្ថិភាព។
អាកាសចរណ៍កាណាដាបានថ្លែងការណ៍ថា យន្តហោះបានហោះហើរប្រើប្រាស់ប្រេងឲ្យអស់ មុនពេលចុះចតប្រកបដោយសុវត្ថិភាពនៅលើដី ។ ម៉ាស៊ីននៃយន្តហោះបានលេចចេញនូវព័ត៌មានមិនប្រក្រតីនៅត្រង់កង់យន្តហោះមួយ ក្នុងចំណោមកង់ទាំង១០របស់យន្តហោះ ។ មិនមានអ្នកដំណើរណាម្នាក់រងរបួសដោយសារការចុះចតបន្ទាន់នេះឡើយ ៕
