សារព័ត៌មាន នគរវត្ត តែងតែនាំមុខគេជានិច្ច
រដ្ឋាភិបាលអ៊ីរ៉ង់ដែលមានមហិច្ឆតាបញ្ជូនផ្កាយរណបទៅកាន់គន្លងតារាវិថីកាលពីថ្ងៃទី៩ ខែកុម្ភៈ ឆ្នាំ២០២០នោះ បានទទួលបរាជ័យ ដោយសារតែកម្លាំងល្បឿននាំផ្កាយរណបនោះមានសភាពយឺតយ៉ាវ ។
ប្រព័ន្ធផ្សព្វផ្សាយអ៊ីរ៉ង់បានផ្សាយថា ការបាញ់បង្ហោះផ្កាយរណបចាប់ផ្តើមនៅវេលាម៉ោង៧និង១៥នាទីយប់ (ម៉ោងនៅក្នុងស្រុក) ស្ថិតនៅទីកន្លែងបាញ់បង្ហោះផ្កាយរណប Imam Khomeini Spaceport ស្ថិតនៅក្នុងខេត្ត Semnan ចម្ងាយប្រហែល២៣០គីឡូម៉ែត្រ ភាគអាគ្នេយ៍ទីក្រុងតេអេរ៉ង់ ។
ប្រភពបានបញ្ជាក់ថា រ៉ុក្កែត Simorgh ឬ Phoenix នោះមិនអាចបញ្ជូនផ្កាយរណបទូរគមនាគមន៍ Zafar1 ចូលទៅកាន់គន្លងតារាវិថីបាននោះឡើយ ។
លោក Ahmad Hosseini អ្នកនាំពាក្យកម្មវិធីអវកាសរបស់ក្រសួងការពារជាតិអ៊ីរ៉ង់បានថ្លែងប្រាប់ប្រព័ន្ធផ្សព្វផ្សាយគ្រប់គ្រងដោយរដ្ឋអ៊ីរ៉ង់យ៉ាងដូច្នេះថា «ដំណាក់កាលទីមួយ ដំណាក់កាលទីពីរ ដំណើរការទៅដោយរលូន ហើយផ្កាយរណបបានជោគជ័យនៅក្នុងការផ្តាច់ខ្លួនចេញពីយានរុញច្រានរបស់ខ្លួន។ ប៉ុន្តែនៅទីបំផុត វាខ្វះល្បឿនដែលតម្រូវការ ទើបមិនអាចដាក់បញ្ចូលបាននៅក្នុងគន្លងតារាវិថី ហើយការបាញ់បង្ហោះនេះក៏ទទួលនូវភាពបរាជ័យ»។
គួរបញ្ជាក់ថា អ៊ីរ៉ង់មានបំណងបញ្ជូនផ្កាយរណបZafar1 ទម្ងន់១១៣គីឡូក្រាមនេះទៅកាន់គន្លងតារាវិថីដើម្បីធ្វើបេសកកម្មប្រមូលរូបភាពទាំងឡាយ ដែលអ៊ីរ៉ង់ត្រូវការដើម្បីសិក្សាអំពីគ្រោះរញ្ជួយដី, ការដោះស្រាយចំពោះគ្រោះមហន្តរាយធម្មជាតិ ក៏ដូចជាអភិវឌ្ឍនវិស័យកសិកម្មរបស់ខ្លួន ។
កាលពីខែមករា ឆ្នាំ២០១៩ អ៊ីរ៉ង់ធ្លាប់បានបរាជ័យម្តងហើយ នៅក្នុងការបញ្ជូនផ្កាយរណបឈ្មោះ Payam ទៅកាន់គន្លងតារាវិថីដែលអ៊ីរ៉ង់ថា ដើម្បីប្រមូលទិន្នន័យអំពីបរិស្ថានអ៊ីរ៉ង់ ៕
