សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យម្នាក់អត់លុយឱ្យថ្លៃបន្ទប់ជួលសម្រេចចិត្តធ្វេីសកម្មភាពគាស់តូបលក់ដូរសម្ភារៈកូនក្មេង និងបន្តទៅគាស់តូបជាងទង ប៉ុនប៉ងលួចទ្រព្យសម្បត្តិតែម្ចាស់គេមកទាន់ចាប់ប្រគល់ជូននគរបាល កាលពីវេលាទៀបភ្លឺ ថ្ងៃទី២១ ខែមេសា ឆ្នាំ២០២០ នៅផ្សារចោមចៅ ភូមិថ្នល់បំបែក សង្កាត់ចោមចៅ៣ ខណ្ឌពោធិសែនជ័យ ។
ជនសង្ស័យឈ្មោះ សឿន សាក់ ភេទប្រុស អាយុ២៨ឆ្នាំ មុខរបរ មិនពិតប្រាកដ ស្នាក់នៅផ្ទះជួល ភូមិផ្សារកំបូល សង្កាត់កំបូល ខណ្ឌកំបូល មានស្រុកកំណើតភូមិសៀមបោយ ឃុំព្រៃចារ ស្រុកជើងព្រៃ ខេត្តកំពង់ចាម ។ ចំណែកម្ចាស់តូបលក់ដូរ ឈ្មោះ ធិ វិញ ភេទប្រុស អាយុ៤១ឆ្នាំ មុខរបរ ជាងទង មានទីលំនៅបុរីធូ លន ភូមិព្រៃព្រីងត្បូង១ សង្កាត់ចោមចៅ២ ខណ្ឌពោធិ៍សែនជ័យ មានស្រុកកំណើត ស្រុកកំពង់សៀម ខេត្តកំពង់ចាម ។ ចំណែកសម្ភារៈដែលជនសង្ស័យលួចបាន គ្រឿងត្បូង តែដកហូតមកវិញ ។
តាមសម្តីជនសង្ស័យបានសារភាពទាំងទ្រហោយំថា ខ្លួនពិតជាខុសមែន ដោយអត់លុយពេក ឃើញឱកាសស្ងាត់នៅ ផ្សារចោមចៅ បានយកផ្លែដែកឆាបទៅឆ្កឹះគាស់ទ្វារតូប ម្ចាស់មកទាន់ចាប់ខ្លួននាំយកទៅប៉ុស្តិ៍ ។
ជនសង្ស័យសមត្ថកិច្ចឃាត់ខ្លួនសាកសួរនិងកសាងសំណុំរឿងបញ្ជូនទៅផ្នែកជំនាញខណ្ឌ បន្តតាមនីតិវិធី ៕ សុខាសែនជ័យ
