សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ ពិតជាអាណោចអាធម័ណាស់ បុរសពោះម៉ាយគ្រប់គ្រងកូនប្រុសស្រីចំនួន ៧នាក់ក្នុងបន្ទុកគ្រួសារ ត្រូវបានគ្រោះអគ្គីភ័យឆាបឆេះផ្ទះ ១ខ្នងអស់ទាំងស្រុង ត្រូវបានគេសង្ស័យអាចបណ្ដាលមកពីឆ្លងចរន្តអគ្គិសនី ។
ហេតុការណ៍គ្រោះអគ្គីភ័យខាងលើ បានកើតឡើងនៅវេលាម៉ោង១ និង៤០នាទី រំលងអាធ្រាត្រឈានចូលថ្ងៃសៅរ៍ ៨រោច ខែជេស្ឋ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី១៣ ខែមិថុនា ឆ្នាំ២០២០ ស្ថិតនៅភូមិខ្សាច់ល្អិត ឃុំអន្សាចំបក់ ស្រុកក្រគរ ខេត្តពោធិ៍សាត់ ។
លោក វរៈសេនីយ៍ឯក ឯម រុន អធិការនៃអធិការដ្ឋានស្រុកនគរបាលស្រុកក្រគរប្រាប់ថា ផ្ទះរងការឆាបឆេះទំហ៊ំ ៥ម៉ែត្រ គុណនឹង ៦ម៉ែត្រ ដំបូលប្រក់ស័ង្កសី ជញ្ជាំងបាំងស័ង្កសី រនាបក្រាលក្ដារ ត្រូវភ្លើងឆាបឆេះរងការខូចខាតអស់ទាំងស្រុង ប៉ុន្តែមិនបង្កឲ្យរងរបួសដល់មនុស្សឬសត្វឡើយ មូលហេតុ៖ សង្ស័យបណ្ដាលមកពីឆ្លងចរន្តអគ្គិសនី ។
លោក វរៈសេនីយ៍ឯក អធិការបន្តថា ករណីគ្រោះអគ្គីភ័យឆាបឆេះផ្ទះប្រជាពលរដ្ឋខាងលើ រថយន្តពន្លត់អគ្គីភ័យអធិការដ្ឋាននគរបាលស្រុកក្រគរចេញជួយអន្តរាគមន៍ដែរ ប៉ុន្តែដោយផ្លូវឆ្ងាយទើបមិនអាចជួយបាន ម្ចាស់ផ្ទះកើតហេតុមានឈ្មោះ សន ភី ភេទប្រុស អាយុ ៤៥ឆ្នាំ ជនជាតិខ្មែរ ពោះម៉ាយ ប្រពន្ធស្លាប់ ទទួលបន្ទុកគ្រប់គ្រងកូនប្រុសស្រីចំនួន ៧នាក់ បច្ចុប្បន្ន រស់នៅភូមិ.ឃុំកើតហេតុ ៕ ដោយ៖ បុឹម ពិន
