សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ៖ កូនអកត្តញូម្នាក់ព្រោះតែអំណាចនៃគ្រឿងញៀន បានយកកាំបិតគំរាមសម្លាប់ឪពុកម្តាយខ្លួនឯងយកប្រាក់ទិញគ្រឿងញៀន ហើយឪពុកម្ដាយមិនឲ្យបែរជាយកកូនកាំបិតចុងស្រួចប៉ងចាក់ខ្លួនឯងបណ្តាលឲ្យរងរបួសធ្ងន់ នៅវេលាម៉ោង២៖៣០នាទីរសៀលថ្ងៃទី២៩ ខែកក្កដាឆ្នាំ២០២០ នៅភូមិស្រះឈូកខាងកើត ឃុំស្រះជីក ស្រុកភ្នំស្រុក ។
មន្រ្តីនគរបាលស្រុកភ្នំស្រុក ប្រាប់ថាជនដែលប៉ងធ្វើអត្តឃាតសម្លាប់ខ្លួនឈ្មោះ អួង សារុំ ភេទប្រុសអាយុ៣១ឆ្នាំ នៅភូមិស្រះឈូកខាងកើត ឃុំស្រះជីក ស្រុកភ្នំស្រុក ខេត្តបន្ទាយមានជ័យ។ ជននេះទើបវិលត្រឡប់មកពីធ្វើការងារនៅប្រទេសថៃ បាន៦ថ្ងៃ ហើយជននេះក៏ធ្លាប់ក្រុមគ្រួសារយកទៅព្យាបាលនៅមណ្ឌលបន្សាបគ្រឿងញៀន ជាច្រើនដងមកហើយដែរតែនៅមិនឈប់ការប្រព្រឹត្តនូវការសេពគ្រឿងញៀននោះទេ ។
ប្រភពដដែលបានបញ្ជាក់ថានៅមុនពេលកើតហេតុជននេះបានលួចរត់ចេញពីមណ្ឌលចត្តាឡីស័កបាត់១យប់ ០១ថ្ងៃ មិនដឹងថាទៅទីណា លុះពេលចូលផ្ទះបានយកកាំបិតគំរាមឪពុកម្តាយ ដើម្បីយកប្រាក់ទិញថ្នាំជក់ បង្កឲ្យមានការភ្ញាក់ផ្អើលអស់អ្នកជិតខាង តែគ្មានអ្នកណាហ៊ានចូលចាប់ព្រោះជននេះមានកាំបិត នៅនឹងដៃ។ ក្រោយមកក៏ដេកលើអង្រឹងហើយបានយកកាំបិតចាក់ខ្លួនឯង ត្រូវចំនួន៦កន្លែងហូរឈាមរងរបួសធ្ងន់ ដើម្បីបញ្ចប់ជីវិតខ្លួន តែមិនបានសម្រេច ដោយឪពុកម្តាយ បងប្អូនឃើញក៏នាំគ្នាដឹកយកមកព្យាបាលនៅមន្ទីរពេទ្យបង្អែកស្រុកភ្នំស្រុក តែដោយស្ថានភាពធ្ងន់ បានបញ្ជូនបន្តទៅព្យាបាលនៅមន្ទីរពេទ្យបង្អែកស្រុកមង្គលបូរី ៕ដោយ៖វណ្ណា
