សារព័ត៌មាន នគរវត្ត តែងតែនាំមុខគេជានិច្ច
រដ្ឋាភិបាលអាហ្វហ្គានីស្ថាន នៅថ្ងៃទី៣ខែកញ្ញា បានប្រកាសថា បានដោះលែងអ្នកទោសតាលីបង់៤០០នាក់តាមកិច្ចព្រមព្រៀង។អ្នកទោសតាលីបង់ដែលបានដោះលែង ស្ថិតនៅក្នុងមន្ទីរឃុំឃាំង Pul-e-Charkhi prison ស្ថិតនៅជាយក្រុង កាប៊ុល ។
សារព័ត៌មាន AFP បានផ្សាយថា រដ្ឋាភិបាល អាហ្វហ្គានីស្ថានបានដោះលែងអ្នកទោសតាលីបង់៤០០នាក់ តាមកិច្ចព្រមព្រៀង ដោះដូរអ្នកទោស លើកលែងអ្នកទោសមួយចំនួនដែលប្រទេសលោកខាងលិចប្រឆាំង។
នៅលើបណ្តាញសង្គម Twitter អ្នកនាំពាក្យគណៈកម្មការសន្តិសុខជាតិអាហ្វហ្គានីស្ថាន លោក Javid Faisal បានប្រកាសថា«ប្រទេសអាហ្វហ្គានីស្ថានបានទទួលកម្លាំងទាហានដែលក្រុមតាលីបង់ចាប់ធ្វើជាចំណាប់ខ្មាំង។ ក្រោយមកក៏បានដោះលែងអ្នកទោសតាលីបង់៤០០នាក់ តាមកិច្ចព្រមព្រៀង ។ ជាមួយគ្នានេះដែរ ភាគីទាំងពីរនឹងខិតខំពិភាក្សាស្វែងរកសន្តិភាពបញ្ចប់សង្គ្រាម។
កាលពីថ្ងៃទី២ខែកញ្ញា មន្ត្រីអាហ្វហ្គានីស្ថានបានប្រកាសឲ្យដឹងថារដ្ឋាភិបាលដោះលែងអ្នកទោសតាលីបង់២០០នាក់ កាលពីយប់ថ្ងៃទី៣១ ខែសីហានិងថ្ងៃទី១ខែកញ្ញា។ ចំណែកក្រុមតាលីបង់វិញក៏បានដោះលែង កម្លាំងទាហានពិសេស៦នាក់របស់ទាហានអាហ្វហ្គានីស្ថានផងដែរ៕ដោយ៖ធី រីណា
