សារព័ត៌មាន នគរវត្ត តែងតែនាំមុខគេជានិច្ច
ប្រទេសថៃ៖ នៅថ្ងៃទី៨ ខែកញ្ញា នាយករដ្ឋមន្ត្រីថៃលោកប្រាយុទ្ធ ចាន់អូចា បញ្ជាក់ថា ប្រាក់ចំណាយសម្រាប់កែទម្រង់ច្បាប់រដ្ឋធម្មនុញ្ញកាលពីឆ្នាំ២០១៧ គឺត្រូវចំណាយយ៉ាងតិច ១០ពាន់លានបាត(ស្មើនឹង៣២០លានដុល្លារអាមេរិក)។
នាយករដ្ឋមន្ត្រីប្រាយុទ្ធ ចាន់អូចាបញ្ជាក់ទៀតថា ក្នុងពេលដែលជំងឺកូវីដ-១៩ រាលដាលខ្លាំងធ្វើឱ្យប៉ះពាល់ដល់សេដ្ឋកិច្ចជាតិ ដូច្នេះការបោះឆ្នោតប្រជាមតិស្តីពីរដ្ឋធម្មនុញ្ញថ្មីនឹងត្រូវចំណាយប្រាក់ជាច្រើន ដោយសារតែទីតាំងបោះឆ្នោតមិនអនុញ្ញាតឲ្យមានមនុស្សច្រើនលើសពី៦០០នាក់។
មន្ត្រីថៃ បានចាប់ផ្តើមគិតពីការចំណាយក្នុងការកែទម្រង់ច្បាប់រដ្ឋធម្មនុញ្ញឆ្នាំ២០១៧ ក្រោយពេលគណៈរដ្ឋមន្ត្រីអនុម័តបើកផ្លូវឲ្យកែទម្រង់រដ្ឋធម្មនុញ្ញ។ តាមគម្រោងថៃនឹងធ្វើការបោះឆ្នោតប្រជាមតិពីរលើក ហើយប្រាក់ចំណាយសម្រាប់ការបោះឆ្នោតនីមួយៗត្រូវចំណាយ ប្រាក់ពី៤ ទៅ ៥ពាន់លានបាត ក្នុងនោះមានទាំងប្រាក់ចំណាយ សម្រាប់ប្រឆាំងកូវីដ-១៩ផងដែរ។
ក្រុមអ្នកឯកទេសវិភាគបានលើកឡើងថា រដ្ឋាភិបាលថៃមិនចង់កែទម្រង់ច្បាប់រដ្ឋធម្មនុញ្ញឡើយ ព្រោះធ្វើឲ្យបាត់បង់ផលប្រយោជន៍ជាច្រើនរបស់រដ្ឋាភិបាលប៉ះពាល់ដល់សិទ្ធិអំណាចរបស់នាយករដ្ឋមន្ត្រី ៕ដោយ៖ធី រីណា
