សារព័ត៌មាន នគរវត្ត តែងតែនាំមុខគេជានិច្ច
ការប្រកួតវគ្គជម្រុះពានរង្វាន់អង់គ្លេស League Cup ឬពានរង្វាន់ Carabao Cup រដូវកាល២០២០-២០២១ បានរកឃើញ៥ក្រុមហើយឡើងទៅវគ្គ៨ក្រុមចុងក្រោយ ដែលសុទ្ធសឹងជាក្រុមខ្លាំងៗនៅលីគកំពូលអង់គ្លេស។
ក្រុមទាំង៥នោះរួមមាន ក្រុមមាន់ខ្នាយមាសTottenham Hotspur បានយកឈ្នះក្រុមខ្លាំងតោខៀវ Chelsea ក្នុងលទ្ធផលកាត់សេចក្តីដោយបាល់កាត់សេចក្តីប៉េណាល់ទី, ក្រុមមេឃខៀវ Man City យកឈ្នះក្រុម Burnley ក្នុងលទ្ធផល៣ទល់០, ក្រុមបិសាចក្រហម Man United បានយកឈ្នះក្រុម Brighton ក្នុងលទ្ធផល៣ទល់០, ក្រុម Newcastle Unitedបានយកឈ្នះក្រុម Newport County ក្នុងលទ្ធផលបាល់កាត់សេចក្តី១១ម៉ែត្រ និងក្រុមEverton បានយកឈ្នះក្រុម West Ham United ក្នុងលទ្ធផល ៤ទល់១។
ការប្រកួតជម្រុះវគ្គ១៦ក្រុមគឺនៅសល់៣គូទៀតដែលត្រូវប្រកួតដើម្បីរក៣ក្រុមទៅកាន់វគ្គ៨ក្រុមបន្តទៀតក្នុងនោះ ក្រុម Brentford ត្រូវប៉ះក្រុម Fulham នៅម៉ោង១១និង៣០នាទីយប់ថ្ងៃនេះ។ ចំណែក២គូទៀតគឺក្រុម Aston Villa ត្រូវប៉ះក្រុម Stoke City នៅម៉ោង១រំលងអធ្រាត្រថ្ងៃទី២ឈានចូលថ្ងៃទី៣ ខែតុលា និងក្រុម Liverpool ត្រូវប៉ះក្រុម Arsenal នៅម៉ោង១និង៤៥នាទីរំលងអធ្រាត្រដូចគ្នា។
គួរបញ្ជាក់ថា ពានរង្វាន់ League Cup ឬពានរង្វាន់ Carabao Cup នេះគឺមានការជម្រុះជាច្រើនដំណាក់កាល ដោយការប្រកួតគ្មានជើងទី២ទេ គឺចាញ់ធ្លាក់ៗ។ សម្រាប់ម្ចាស់ពានរង្វាន់នេះកាលពីរដូវកាលមុនបានទៅលើក្រុមមេឃខៀវ Man City ដែលធ្លាប់ឈ្នះពានមួយនេះចំនួន៧ដងមកហើយ ខណៈដែលក្រុមដែលឈ្នះពានរង្វាន់មួយនេះច្រើនជាងគេគឺក្រុម Liverpool ដែលធ្លាប់ឈ្នះចំនួន៨ដង ៕ដោយ៖ភារៈ
