សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំ ៖ កម្លាំងនគរបាលនៃអធិការដ្ឋានស្រុកកំពង់ស្វាយ សហការជាមួយកម្លាំងប៉ុស្តិ៍នគរបាលរដ្ឋបាលត្រពាំងឫស្សី បានឃាត់ខ្លួនជនបង្កម្នាក់ បន្ទាប់ពីធ្វើសកម្មភាពយកដំបងគប់ទៅលើកញ្ចក់រថយន្តរបស់អ្នកធ្វើដំណើរឆ្លងកាត់ពីខេត្តកំពង់ធំទៅខេត្តព្រះវិហារ កាលពីថ្ងៃទី៥ ខែតុលា ឆ្នាំ២០២០ វេលាម៉ោង៨និង៣០នាទីយប់ នៅចំណុចកន្លែងលក់ក្រឡានតាមផ្លូវជាតិលេខ៦២ ស្ថិតក្នុងភូមិ វល្លិយាវ ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ ។
យោងតាមរបាយការណ៍ពីសមត្ថកិច្ចមូលដ្ឋានបានឲ្យដឹងថា ជនបង្កជាជនមានសតិមិនគ្រប់គ្រាន់ និងពុំស្គាល់អត្តសញ្ញាណ បានធ្វើសកម្មភាពយកដំបងគប់កញ្ចក់រថយន្តរបស់អ្នកធ្វើដំណើរឆ្លងកាត់បណ្តាលឲ្យខូចរថយន្ត៤គ្រឿងក្នុងនោះមាន ១.-ម៉ាកហ៊ីយ៉ាន់ដាយបែន (បែកកញ្ចក់មុខ), ២-រថយន្តម៉ាកតូយ៉ូតាកូរ៉ូណា (បែកកញ្ចក់មុខ), ៣-រថយន្តម៉ាកតូយ៉ូតាកាមរី (បែកកញ្ចក់មុខ), ៤-រថយន្តភីកអាប់ (បែកកញ្ចក់មើលក្រោយ)។
ករណីខាងលើនេះសមត្ថកិច្ចបាននាំខ្លួនជនបង្កមកអធិការដ្ឋាននគរបាលស្រុកកំពង់ស្វាយ និងកំពុងស្រាវជ្រាវស្វែងរកក្រុមគ្រួសារ ដើម្បីមកទទួលយកទៅលំនៅឋានវិញ៕ជ្រោយពេជ្រ
