🌟មាស សុខសោភា ថានឹងបង្ហាញមុខក្នុងផលិតកម្មថ្មីនៅអំឡុងខែធ្នូឆ្នាំនេះ

ភ្នំពេញ៖មានការតាមដានពីដំណើរវិលចូលផលិតកម្មថ្មីរបស់តារាចម្រៀង មាស សុខសោភា ក្រោយពីនាងបញ្ចប់ការងារនៅផលិតកម្មថោនអស់ជាច្រើនខែមកហើយ។ នាងបញ្ជាក់ដោយផ្ទាល់ថា នឹងលេចមុខក្នុងផលិតកម្មថ្មីអមដោយបទចម្រៀងថ្មីនៅអំឡុងខែធ្នូឆ្នាំ២០២០នេះ។

តបទៅនឹងការទន្ទឹងរងចាំ តារាចម្រៀងរូបនេះនឹងបញ្ចេញស្នាដៃថ្មីក្នុងផលិតកម្មផ្ទាល់ខ្លួនក្នុងពេលដ៏ខ្លីខាងមុខ ខណៈការបង្ហាញវត្តមានក្នុងផលិតកម្មថ្មីក៏នឹងត្រូវបង្ហាញនៅអំឡុងចុងខែធ្នូឆ្នាំ២០២០នេះផងដែរ។ ខណៈផលិតកម្មធំ២ដែលបានចចារជាមួយមាស  សុខសោភា នោះគឺផលិតកម្មហង្សមាស និងផលិតកម្មGalaxy Navatra ហើយនាងអាចនឹងសម្រេចចិត្តចូលផលិតកម្មមួយក្នុងចំណោមផលិតកម្មទាំង២ខាងលើ។ ក្នុងជំនួបផ្ទាល់ថ្មីៗនេះ មាស សុខសោភា ស្នើមិនបញ្ជាក់ឈ្មោះផលិតកម្មថ្មីដែលនាងនឹងចូលច្រៀង។ ទោះជាយ៉ាងណានាងបង្ហើបថាការចចារកំពុងបន្ត ប៉ុន្តែមិនយូរទេបទចម្រៀងក្នុងផលិតកម្មថ្មីនឹងត្រូវបង្ហាញនៅក្នុងអំឡុងខែធ្នូឆ្នាំនេះផងដែរ។ ជុំវិញការចចារនាងបញ្ជាក់ដែរថា​ដោយសារលក្ខខណ្ឌនាងស្នើទៅកាន់ផលិតកម្មថ្មី ដើម្បីមានឱកាសផលិតបទចម្រៀងថ្មីសម្រាប់ផលិតកម្មផ្ទាល់ខ្លួន។ នាងថាបើទើបីជាមានកិច្ចសន្យាការងារក្នុងផលិតកម្មថ្មីក៏នាងនឹងស្ថិតក្នុងកិច្ចសន្យាមួយរយៈពេលខ្លីប៉ុណ្ណោះគឺមិនធ្វើច្រើនឆ្នាំនោះទេ។ សម្រាប់សំណួរដែលលើកឡើងថានឹងយកបងប្រុសនាង គឺលោក មាស សុខរតនៈ មករួមការងារជាមួយនាងដែរនោះត្រូវបានតារាស្រីរូបនេះបញ្ជាក់ថា ខាងផលិតកម្មថ្មីក៏មានបំណងទទួលយកបងប្រុសនាងដើម្បីចូលរួមដែរ ប៉ុន្តែនាងចង់ឲ្យបងប្រុសនាងសម្រាកមួយរយៈព្រោះតែកន្លងមកបងប្រុសនាងរវល់ច្រើន ហើយអាចនឹងរួមការងារជាមួយនាងវិញនៅពេលខាងមុខ។ នាងបញ្ជាក់ដែរថា មុនពេលចេញបទចម្រៀង នៅផលិតកម្មថ្មី នាងនឹងបញ្ចេញស្នាដៃក្នុងផលិតកម្មផ្ទាល់ខ្លួនដើម្បីបម្រើការកម្សាន្តរបស់អ្នកគាំទ្រ។ ហើយនាងក៏ចង់ទុកពេលពង្រឹងការងារមុខជំនួញផ្ទាល់ខ្លួនខ្លះផងដែរ។

​គួរបញ្ជាក់ដែរថា ក្នុងអំឡុងខែមិថុនា ឆ្នាំ ២០២០ តារាចម្រៀងលំដាប់ជួរមុខ មាស សុខសោភា បានប្រកាសចាកចេញពីផលិតកម្មថោន។ នាងទើបនឹងបញ្ចេញបទចម្រៀងថ្មីក្នុងផលិតកម្មផ្ទាល់ខ្លួនដែលមានគួរស្នេហ៍នាងជាអ្នកជួយគ្រប់គ្រងប៉ុណ្ណោះ ខណៈអ្នកគាំទ្រចង់ឲ្យនាងចូលប្រឡូងក្នុងផលិតកម្មធំមួយដើម្បីរក្សាលំនឹងទីផ្សារការងារនានា៕ ដោយ៖ វឌ្ឍនា