សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ រដ្ឋាភិបាលបារាំង និងអល្លឺម៉ង់ មានគម្រោងប្រកាសដាក់ប្រទេសក្នុងគ្រាអាសន្នជាលើកទីពីរ ខណៈការឆ្លងរាលដាលកូវីដ-១៩ នៅក្នុងប្រទេសទាំងពីរកើនឡើងខ្ពស់ប៉ុន្មានថ្ងៃចុងក្រោយនេះ។ គម្រោងខាងលើកើតឡើងក្រោយពេលចំនួនអ្នកស្លាប់ដោយកូវី—១៩ កើនឡើង៤០ភាគរយក្នុងតំបន់អឺរ៉ុប ក្នុងរយៈមួយសប្តាហ៍ប៉ុណ្ណោះ។
អធិការបតីអាល្លឺម៉ង់ លោកស្រី Angela Merkel នឹងជួបពិភាក្សាជាមួយបណ្តាអភិបាលរដ្ឋ ស្តីពីការបិទ ភោជនីយដ្ឋាន ក្លិបកម្សាន្ត សាលារៀន…ទប់ស្កាត់ការឆ្លងរាលដាលកូវីដ-១៩ជាថ្មី។
នៅក្នុងប្រទេសបារាំងជាទីកន្លែងដែលមានអ្នកឆ្លងកើនឡើងដល់ជាង៥ម៉ឺននាក់ក្នុងមួយថ្ងៃៗ ។ ប្រធានាធិបតីបារាំង លោកEmmanuel Macron បានប្រកាសថានឹងមានវិធានការកាត់បន្ថយការជួបជុំគ្នា។ រដ្ឋាភិបាលបារាំងបានសម្រេចបិទទីតាំងមួយចំនួនដែលអាចបង្កឲ្យមានចំនួនអ្នកឆ្លងច្រើន ។ ក្រៅពីបារាំងអាល្លឺម៉ង់នៅមានប្រទេស អេស្ប៉ាញ ប្រទេសផ្សេងៗទៀតនៅតំបន់អឺរ៉ុប។
បច្ចុប្បន្នមេដឹកនាំតំបន់អឺរ៉ុបស្ថិតក្នុងដំណាក់កាលខិតខំ ដើម្បីធ្វើឲ្យមានតុល្យភាពទាំងវិស័យសេដ្ឋកិច្ចនិងសុខភាពពលរដ្ឋ។
ជំងឺឆ្លងរាលដាល នៅតែបន្តគំរាមកំហែងអឺរ៉ុប ធ្វើឲ្យប្រទេសជាច្រើនទៀតត្រូវបន្ត ដាក់ប្រទេសក្នុងគ្រាអាសន្នជាថ្មី។
តាមតួលេខរបស់គេហទំព័រ Worldometer គិតដល់វេលាម៉ោង៨និង៣០នាទីព្រឹកថ្ងៃទី២៩ខែតុលា នៅទូទាំងពិភពលោកមានអ្នកឆ្លងកូវី-១៩ កើនឡើងដល់ជាង ៤៤,៧លាននាក់ និងស្លាប់ ជាង១,១៧លាននាក់ ជាមួយគ្នានេះក៏មានអ្នកព្យាបាលជាសះស្បើយ ជាង ៣២,៧លានានក់ផងដែរ៕ដោយ៖ធី រីណា
