សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ នៅព្រឹកថ្ងៃអង្គារ ៩កេីត ខែមិគសិរ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៤ ខែវិច្ឆិកា ឆ្នាំ២០២០ គណៈកម្មាធិការសិទ្ធិមនុស្សកម្ពុជា បានសហការជាមួយរដ្ឋបាលខេត្តព្រះសីហនុរៀបចំសិក្ខាសាលាស្តីពីការផ្សព្វផ្សាយរបាយការណ៍ជាតិ និងអនុសាសន៍នៃយន្តការពិនិត្យជាសកលតាមកាលកំណត់ (UPR) នៅសណ្ឋាគារឯករាជ្យ ខេត្តព្រះសីហនុ។
សិក្ខាសាលានេះប្រព្រឹត្តទៅក្រោមអធិបតីភាព លោកកែវ រ៉េមី រដ្ឋមន្រ្តីប្រតិភូអមនាយករដ្ឋមន្ត្រី និងជាប្រធានគណៈកម្មាធិការសិទ្ធិមនុស្សកម្ពុជា (គ.ស.ម.ក.)។
អង្គសិក្ខាសាលាបាននាំយកប្រធានបទចំនួនបីមកចែករំលែកដល់សិក្ខាកាមដែលជាមន្រ្តីរាជការមកពីគ្រប់មន្ទីរខេត្តមានចំនួនប្រមាណ ១០០នាក់។ ប្រធានបទទាំងបីរួមមាន៖
១. អ្វីទៅជាយន្តការពិនិត្យជាសកលតាមកាលកំណត់ បង្ហាញដោយ លោក ស្រ៊ាង ចិន្តា សមាជិក និងជាប្រធាននាយកដ្ឋានសិទ្ធិមនុស្សអន្តរជាតិនិងអង្គការសហប្រជាជាតិ នៃគ.ស.ម.ក
២. ខ្លឹមសាររបាយការណ៍ UPR ជុំទី៣ របស់កម្ពុជា បង្ហាញដោយលោកអ៊ិត រ៉ាឌី អនុប្រធាន គ.ស.ម.ក. និងជាសមាជិកឧត្តមក្រុមប្រឹក្សានៃអង្គចៅក្រម
៣. ដំណេីរការនៃការពាររបាយការណ៍ UPR និងអនុសាសន៍ជុំទី៣ បង្ហាញដោយ លោកកត្តា អ៊ន សមាជិក គ.ស.ម.ក.។
ទន្ទឹមនឹងនេះ សិក្ខាសាលាក៏មានជាវេទិការពិភាក្សា និងសំនួរចម្លេីយពាក់ព័ន្ធនឹងប្រធានបទខាងលេី និងបញ្ហាជុំវិញវិស័យសិទ្ធិមនុស្សផងដែរ៕
ដោយ៖ សូរិយា
