សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាល៖ បុរសម្នាក់បើកម៉ូតូលឿនពេកជ្រុលទៅបុកជាមួយរថយន្តពេញទំហឹងបណ្ដាលឲ្យអ្នកបើកម៉ូតូស្លាប់ភ្លាមៗនៅនឹងកន្លែងកើតហេតុ។
ហេតុការណ៍នេះបានកើតឡើងនៅវេលាម៉ោង ៦និង៣០នាទីព្រលប់ថ្ងៃអាទិត្យទី១៣ ខែធ្នូ ឆ្នាំ២០២០ ស្ថិតនៅតាមបណ្ដោយផ្លូវលេខ១១៥ ក្រុងតាខ្មៅ ខេត្តកណ្ដាល។
សមត្ថកិច្ចបានឲ្យដឹងថា សពជនរងគ្រោះមានឈ្មោះ ជិន មករា អាយុ ៤០ឆ្នាំ មុខរបរបម្រើការងារនៅក្រុមហ៊ុនផ្នែកដឹកជញ្ជូន មានប្រពន្ធ និងកូនប្រុសម្នាក់ មានទីលំនៅក្នុងភូមិធម្មត្រ័យ សង្កាត់ព្រៃស ខណ្ឌដង្កោ រាជធានីភ្នំពេញ។
ប្រភពព័ត៌មានពីប្រជាពលរដ្ឋនៅកន្លែងកើតហេតុបានឲ្យដឹងថា មុនពេលកើតហេតុគេបានឃើញបុរសរងគ្រោះនេះបើកម៉ូតូម៉ាកស៊ុយហ្ស៊ុយគី ឡែត ពាក់ស្លាកលេខភ្នំពេញ 1HE-9186 ធ្វើដំណើរតាមបណ្ដោយផ្លូវលេខ១១៥ ក្នុងទិសដៅពីកើតទីលិចយ៉ាងលឿន ខណៈមកដល់ចំណុចកើតហេតុបានជ្រុលទៅបុករថយន្តម៉ាកសាំយ៉ុងដឹកមាន់មួយគ្រឿង ពាក់ស្លាកលេខ ព្រះសីហនុ 2A-677 ដែលធ្វើដំណើរក្នុងទិសដៅពីលិចទៅកើតក្នុងល្បឿនលឿនដូចគ្នាចំពីមុខពេញទំហឹងបណ្តាលឲ្យភាគីខាងម៉ូតូស្លាប់ភ្លាមៗនៅកន្លែងកើតហេតុ។ ក្រោយកើតហេតុអ្នកបើករថយន្តត្រូវបានកម្លាំងសមត្ថកិច្ចឃាត់ខ្លួនបានភ្លាមៗ។
បន្ទាប់ពីកើតហេតុកម្លាំងសមត្ថកិច្ចមូលដ្ឋានសហការជាមួយនឹងជំនាញចរាចរណ៍ក្រុងតាខ្មៅចុះមកវាស់វែងយកម៉ូតូ និងរថយន្តទៅរក្សាទុកនៅអធិការដ្ឋានក្រុងតាខ្មៅ រង់ចាំដោះស្រាយគ្នានៅពេលក្រោយ។ចំណែកសពបានធ្វើកំណត់ហេតុប្រគល់ឲ្យទៅក្រុមគ្រួសារយកទៅធ្វើបុណ្យតាមប្រពៃណី៕ជ្រោយពេជ្រ
