សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ៖ ទណ្ឌិត៦៣នាក់ នៅខេត្តបន្ទាយមានជ័យ ត្រូវបានស្នើសុំលែងទោសនិង បន្ធូរបន្ថយទោសឱកាសបុណ្យចូលឆ្នាំខ្មែរនិងបុណ្យវិសាខបូជា នេះបើយោងកិច្ចប្រជុំមួយនារសៀលថ្ងៃទី២៨ ខែមករា ឆ្នាំ ២០២១ម្សិលមិញ របស់គណៈកម្មការ ខេត្តបន្ទាយមានជ័យ ស្តីពីលើកលែងទោសនិង បន្ធូរបន្ថយទោសដល់ទណ្ឌិតក្នុងឱកាសបុណ្យចូលឆ្នាំប្រពៃណីជាតិខ្មែរខាងមុខ និង បុណ្យវិសាខបូជាឆ្នាំ២០២១នេះ។
ក្នុងកិច្ចប្រជុំនោះ ដឹកនាំដោយលោក គឹង វណ្ណៈ អភិអភិបាលរងខេត្តតំណាងឲ្យ ឯកឧត្តម អ៊ុំ រាត្រី អភិបាលខេត្ត បន្ទាយមានជ័យ លោក តេង សាម៉ៃ ព្រះរាជអាជ្ញារងនៃអយ្យការអមសាលាដំបូងខេត្ត លោកឧត្តមអគ្គានុរក្សថ្នាក់លេខ២ អ៊ុង ស៊ីផាន ប្រធានពន្ធនាគារ ខេត្តបន្ទាយមានជ័យ រួមទាំងមន្ត្រីជំនាញកិច្ចការសាលាដំបូងខេត្ត និងមន្ត្រីពន្ធនាគារនុរក្សជាច្រើននាក់ ។
លោកឧត្តមអគ្គានុរក្សថ្នាក់លេខ២ អ៊ុង ស៊ីផាន បានអានស្ថិតីបញ្ជីឈ្មោះនិងសាវតានៃទណ្ឌិតជនជាតិខ្មែរនិងជនបរទេសដែលត្រូវបានអង្គភាពពន្ធនាគារខេត្តបន្ទាយមានជ័យស្នើសុំការអនុម័តពីគណៈកម្មការ ដើម្បីបញ្ជូនឈ្មោះបន្ធូរបន្ថយទោសសុំការសម្រេចពីថ្នាក់លើ ក្នុងនោះមានទណ្ឌិតចំនួន៣០នាក់មានស្រី២នាក់ ត្រូវបានស្នើសុំលើកលែងទោសនិងបន្ធូរបន្ថយទោសក្មុងឱកាសបុណ្យចូលឆ្នាំប្រពៃណីជាតិខ្មែរ ដែលនឹងប្រព្រឹត្តទៅក្នុងថ្ងៃទី១៤.១៥.១៦ ខែមេសាឆ្នាំ២០២១ ខាងមុខ និងទណ្ឌិតចំនួន៣៣នាក់ក្នុងនោះមានស្រី៥នាក់ ត្រូវបានស្នើសុំលើកលែងទោស និងបន្ធូរបន្ថយទោសក្នុងឱកាសបុណ្យវិសាខបូជាខាងមុខ ដែលនឹងប្រព្រឹត្តទៅក្នុងថ្ងៃ ២៦ខែមេសា ឆ្នាំ២០២១ ។
លោកគឹង វណ្ណៈ អភិបាលរងខេត្តបន្ទាយមានជ័យទទួលស្គាល់ការខិតខំប្រឹងប្រែងគ្រប់គ្រង ថែរក្សាអ្នកជាប់ឃុំ ក្នុងនោះបានពិនិត្យ វាយតម្លៃលើសកម្មភាពអនុវត្ត គុណសម្បត្តិនិងរយៈពេលនៃការជាប់ឃុំរបស់ទណ្ឌិត ហើយវាយតម្លៃ ស្នើសុំលើកលែងទោសនិងបន្ធូរបន្ថយទោស ។
លោកអភិបាលរងខេត្តសង្ឃឹមថា ដំណើរការនេះនឹងមិនមានអំពើពុករលួយ ភាពលំអៀង និយមបក្ខពួក ភាពមិនប្រក្រតីឬបញ្ហាកើតឡើងនោះឡើយ ពោលគឺធ្វើប្រកបដោយការទទួលខុសត្រូវនិងប្រសិទ្ធិភាពខ្ពស់ផងដែរ។ ក្នុងនោះលោកបានធ្វើការផ្តាំផ្ញើរដល់អ្នកជាប់ឃុំទាំងអស់ក្រោយពីបានចេញពីពន្ធនាគារវិញត្រូវចេះកែខ្លួនឲ្យក្លាយជាមនុស្សល្អ ពលរដ្ឋល្អទើបអាចរស់នៅក្នុងសង្គមគ្រួសារនិងសង្គមជាតិបានស្រួល៕ ដោយ៖វណ្ណា
