សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាល ៖ នារីម្នាក់បានស្លាប់នៅនឹងកន្លែង ខណៈជួបគ្រោះថ្នាក់ចរាចរណ៍ ពេលបើកម៉ូតូត្រូវរថយន្តក្រឡុកស៊ីម៉ងត៍ បើកកៀរពីក្រោយធ្វើឱ្យដួលរួចហើយកិនពីលើថែមទៀត។ ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីម៉ោង ៧និង៣០នាទីយប់ថ្ងៃសៅរ៍ទី ៦ ខែកុម្ភៈឆ្នាំ ២០២១ ស្ថិតនៅតាមបណ្ដោយផ្លូវបេតុង ត្រង់ចំណុចបុរីពិភពថ្មីកំបូល៣ ភូមិត្រពាំងត្រំ ឃុំបែកចាន ស្រុកអង្គស្នួល ខេត្តកណ្តាល។
សមត្ថកិច្ចបានឲ្យដឹងថា សពជនរងគ្រោះមានឈ្មោះ ភ័ស ម៉ារី អាយុ២៤ឆ្នាំ មានប្តីនិងកូន បច្ចុប្បន្នស្នាក់នៅជិតកន្លែងកើតហេតុ មានស្រុកកំណើតនៅខេត្តព្រៃវែង។
ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគាត់បានឃើញនារីម្នាក់បើកម៉ូតូម៉ាកហុងដាស្គូពីពណ៌ក្រហម ពាក់ស្លាកលេខភ្នំពេញ 1HM-8745 ក្នុងគោលបំណងជិះទៅផ្សារកំបូល៣ ធ្វើដំណើរតាមបណ្តោយផ្លូវបេតុង ក្នុងទិសដៅពីត្បូងទៅជើង ខណៈមកដល់ចំណុចកើតហេតុស្រាប់តែមានរថយន្តក្រឡុកស៊ីម៉ងត៍ ដែលពាក់ស្លាកលេខភ្នំពេញ5A-2581 បើកមកពីក្រោយ បម្រុងបត់ទៅកើតក៏ជ្រុលចង្កូតទៅកៀរម៉ូតូឲ្យដួល រួចកិនពីលើនារីរងគ្រោះតែមិនស្លាប់ រួចក៏បើកថយក្រោយមកកិនថែមទៀតបណ្តាលឲ្យស្លាប់តែម្តង។ ក្រោយកើតហេតុអ្នកបើករថយន្តព្យាយាមបើករត់បានបន្តិចក៏ទុករថយន្តចោលរត់គេចខ្លួនបាត់។
បន្ទាប់ពីកើតហេតុសមត្ថកិច្ចមូលដ្ឋានបានសហការជាមួយជំនាញចរាចរណ៍ចុះមកដល់យកម៉ូតូ និងរថយន្ដទៅរក្សាទុកនៅអធិការដ្ឋានស្រុកអង្គស្នួល ខេត្តកណ្តាល និងធ្វើកំណត់ហេតុប្រគល់សពឲ្យទៅក្រុមគ្រួសារ យកទៅស្រុកកំណើតធ្វើបុណ្យតាមប្រពៃណី៕ជ្រោយពេជ្រ
