សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ មានករណីគ្រោះថ្នាក់ចរាចរណ៍ដ៏គួរឱ្យរន្ធត់មួយបានកើតឡើងដេាយសារតែរថយន្តបានជ្រុលទៅបុកជាមួយនឹងម៉ូតូដែលឈប់ចតខ្វះការប្រុងប្រយ័ត្នបណ្ដាលឲ្យស្ត្រីម្នាក់រងរបួសធ្ងន់ បង្កការភ្ញាក់ផ្អើលដល់អ្នកភូមិទាំងយប់។
ហេតុការណ៍នេះបានកើតឡើងកាលពីវេលាម៉ោង៧និង៤៨នាទីយប់ថ្ងៃទី៦ខែមិថុនា ឆ្នាំ២០២១នៅលើផ្លូវលំ ស្ថិតក្នុងភូមិធ្មល់ សង្កាត់ចេក ក្រុង ស្វាយរៀង ។
សមត្ថកិច្ចនគរបាលក្រុងស្វាយរៀងបានឱ្យដឹងថា ស្ត្រីរងគ្រោះមានឈ្មោះ អ៊ុង សុខលី អាយុ៣៦ឆ្នាំ មុខរបរកសិករ រស់នៅភូមិស្វាយ សង្កាត់ចេក ក្រុង ស្វាយរៀង ខេត្តស្វាយរៀង។
ចំណែកអ្នកបើករថយន្តត្រូវបានគេស្គាល់ឈ្មោះ គង់ សុីដា អាយុ ៣២ឆ្នាំ មុខរបរលក់ដូរ រស់នៅភូមិធ្មល់ សង្កាត់ ចេក ក្រុងស្វាយរៀង ខេត្តស្វាយរៀង ក្រោយពេលកើតហេតុបានរត់គេចខ្លួនបាត់ភ្លាមៗ។
អ្នកភូមិបានឱ្យដឹងថា មុនកើតហេតុមានស្ត្រីម្នាក់បានជិះម៉ូតូមួយគ្រឿងម៉ាកហុងដាគុបជ្រុង ពណ៌ទឹកប៊ិក ពាក់ស្លាកលេខ កំពង់ធំ៦A-១៤១៦ក្នុងទិសដៅពីជើងទៅត្បូងហើយក៏បានឈប់ម៉ូតូចតបញ្រ្ចាសផ្លូវខ្វះការប្រុងប្រយ័ត្ន ស្រាប់តែមានរថយន្ដមួយគ្រឿងម៉ាក ព្រូស ពណ៌ទឹកប្រាក់ ពាក់ស្លាកលេខ ភ្នំពេញ ២BD-២៤១៦ បើកក្នុងទិសដៅពីត្បូងទៅជើងបានមកបុកម៉ូតូយ៉ាងពេញទំហឹងបង្កការភ្ញាក់ផ្អើលតែម្ដង។
ក្រោយកើតហេតុអ្នករបួសត្រូវបានដឹកយកទៅសម្រាកព្យាបាលនៅមន្ទីរពេទ្យខេត្តស្វាយរៀង ហើយសមត្ថកិច្ចជំនាញក៏បានធ្វើការវាស់វែងនិងអូសយកមធ្យោបាយធ្វើដំណើរទាំង២គ្រឿងទៅរក្សាទុកនៅអធិការដ្ឋាននគរបាលក្រុងស្វាយរៀងដើម្បីដោះស្រាយនាពេលក្រោយតាមច្បាប់។
សមត្ថកិច្ចបានបញ្ជាក់ថា មូលហេតុដែលនាំឱ្យមានគ្រោះថ្នាក់ចរាចរណ៍នេះគឺ ដោយសារតែម៉ូតូឈប់ចតបញ្រ្ចាសផ្លូវខ្វះការប្រុងប្រយ័ត្ន ៕
ដោយ៖យឹម សុថាន
