សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ គេបានប្រទះឃើញនារីម្នាក់ដេកស្លាប់សង្ស័យមកពីខ្យល់គរ ឬក៏ជាករណីអ្វីឲ្យប្រាកដនោះទេ ហើយក៏មិនដឹងថាគាត់ស្លាប់តាំងពីពេលណានោះដែរ។
ហេតុការណ៍នេះបង្កឲ្យមានការភ្ញាក់ផ្អើលឡើងកាលពីវេលាម៉ោង៦ និង៣០នាទីព្រឹកថ្ងៃទី០២ ខែសីហា ឆ្នាំ ២០២១ នៅចំណុចដីឡូត៍មួយកន្លែង តាមបណ្តោយផ្លូវលេខ៨៦ ក្នុងភូមិ៧ សង្កាត់ស្រះចក ខណ្ឌដូនពេញ រាជធានីភ្នំពេញ ។
បើតាមការបញ្ជាក់ពីសមត្ថកិច្ចបានឱ្យដឹងថា នារីដែលដេកស្លាប់នោះមានឈ្មោះ ឡេង សីណា អាយុ២៧ឆ្នាំ ស្នាក់នៅមិនពិតប្រាកដ មានស្រុកកំណើតនៅស្រុកមោងឫស្សី ខេត្តបាត់ដំបង ។
ប្រភពព័ត៌មាននៅកន្លែងកើតហេតុបានឱ្យដឹងដែរថា នារីរូបនេះមិនមានប្តីនោះទេ ពោលគឺគាត់រស់នៅម្នាក់ឯង គ្មានផ្ទះសម្បែង ព្រមទាំងមានជំងឺប្រចាំកាយ ដោយរូបរាងកាយមានសភាពស្គមស្គាំង ស្លេកស្លាំង គ្មានកម្លាំងកំហែងតាំងពីយូរមកហើយ ។ កាលនៅរស់គេឃើញនារីរងគ្រោះរូបនេះដើរនៅម្តុំៗជិតកន្លែងកើតហេតុនេះ ។ បន្ទាប់មកនៅព្រឹកកើតហេតុនេះស្រាប់តែគេប្រទះឃើញគាត់ដេកស្លាប់បង្កការភ្ញាក់ផ្អើលដល់ប្រជាពលរដ្ឋនៅក្បែរកន្លែងកើតហេតុរាយការណ៍ប្រាប់ទៅសមត្ថកិច្ចមូលដ្ឋានចុះមកដល់ទីតាំងកើតហេតុ ហើយបានរាយការណ៍បន្តប្រាប់ជំនាញខាងធ្វើតេស្តសំណាក និងសមត្ថកិច្ចជំនាញខាងធ្វើកោសល្យវិច័យមកពិនិត្យតាមជំនាញបន្តទៀត ៕
ដោយ៖ ជ្រោយពេជ្រ
