សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ធ្វើឲ្យអ្នកគាំទ្រភ្ញាក់ផ្អើលមិនតិចទេក្រោយពីតារាចម្រៀងស្រស់សង្ហាលោក យ៉ាកូ ត្រូវបានប្រកាសក្លាយជាតារាចម្រៀងផ្លូវការរបស់ Chanel Film Media។ ក្រោយពីប្រកាសភ្លាម តារាចម្រៀងរូបនេះបានបញ្ចេញបទចម្រៀងថ្មីយ៉ាងពិីរោះរណ្តំចិត្តភ្លែត។
បទចម្រៀងរបស់លោកនៅលើឆាណែលមួយនេះគឺជាបទចម្រៀងមរតកដើមដែលមានចំណងជើងថា «មិនអស់អាល័យ» ដែលជាសំនៀងដើមរបស់លោក សិុន ស៊ីសាមុត។ ពេលនេះលោកបានបញ្ចេញស្នាដៃផលិតMV ជាផ្លូវការហើយ និងធ្វើឲ្យទស្សនិកជនពេញចិត្តកាន់តែខ្លាំង។ ពេញចិត្តព្រោះតែលោកបានផ្តិតយកនូវទិដ្ឋភាពដ៏ស្រស់ស្អាតផ្ទាល់ពីប្រទេសកូរ៉េ អមដោយការសម្តែងបានយ៉ាងល្អរបស់តារាចម្រៀងរូបនេះផងដែរ។ បញ្ចេញសា្នដៃថ្មីលើកដំបូងនេះភ្លាមលោកទទួលបានការពេញចិត្ត និងគាំទ្រភ្លែតមិននឹកស្មានដល់ ព្រោះតែកន្លងទៅអ្នកគាំទ្រលោកក៏ធ្លាប់ទន្ទឹងរង់ចាំ និងស្នើឲ្យកំលោះសង្ហារូបនេះបញ្ចេញមុខ និងស្នាដៃបទចម្រៀងផងដែរ។ លោក ជួន
អមរិទ្ធ អ្នកគ្រប់គ្រងទូទៅរបស់ក្រុមChanel Film Media បានបញ្ជាក់ថា លោកពិតជារីករាយណាស់ដែលលោក យ៉ាកូ បានក្លាយជាសមាជិកក្រុមចម្រៀងបុរស ខណៈដែលក្នុងក្រុមភាគច្រើនជាអ្នកចម្រៀងនារី។ លោកថា ការសម្រេចចិត្តទទួលយកលោកយ៉ាកូ ព្រោះតែគាត់ជាសិល្បករមានសមត្ថភាព និងទឹកដមសំនៀងពិីរោះប្លែកកម្រមាន។ លោកថា គាត់ក៏មានអ្នកគាំទ្រស្រាប់ជាច្រើនដែលពេញចិត្តនឹងស្នាដៃសិល្បៈរបស់លោក ហើយតារាចម្រៀងរូបនេះក៏មានទាំងរូបសម្រសស្រស់សង្ហា អត្តចរិតរួសរាយរាក់ទាក់ស្លូតបូត និងមានទំនាក់ទំនងល្អជាមួយមនុស្សជុំវិញខ្លួន។ លោកថា
ការបញ្ចេញស្នាដៃដំបូងនេះគឺជាការCoverស្នាដៃមរតកដើម ហើយជំហានបន្ទាប់ក្រុមការងារនឹងធ្វើការបញ្ចេញបទចម្រៀងថ្មីផ្ទាល់ខ្លួន។ លោកបញ្ជាក់ថា បច្ចុប្បន្នតារាចម្រៀងវ័យ៣០ឆ្នាំរូបនេះកំពុងស្នាក់នៅនិងបំពេញការងារនៅប្រទេសកូរ៉េខាងត្បូង ហើយលោកក៏តែងបង្ហាញមុខក្នុងកម្មវិធីសិល្បៈដែលត្រូវបានពលរដ្ឋខ្មែររស់នៅទីនោះរៀបចំផងដែរ ។ លោករំពឹងថា ក្រោយបង្ហាញបទចម្រៀងថ្មីហើយប្រសិនបើលោកមានឱកាសមកកម្ពុជា លោកពិតជាទទួលបានឱកាសឡើងឆាកតន្ត្រីជាក់ជាមិនខាន។ លោកថា ដើម្បីបំពេញចិត្តអ្នកគាំទ្រស្នាដៃថ្មីរបស់តារាចម្រៀងចំណូលថ្មីរូបនេះនឹងបញ្ចេញជាបន្តបន្ទាប់ អមដោយ MV បទចម្រៀងដែលនឹងត្រូវផ្តិតយកទេសភាពពីប្រទេសកូរ៉េបង្ហាញជូនទស្សនិកជនទស្សនា និងស្តាប់កម្សាន្តផងដែរ។
លោកថា ទាំងតារាចម្រៀងចំណូលថ្មី និងតារាចម្រៀងក្នុងក្រុមFilm Media ពិតជាខិតខំប្រឹងប្រែងអភិវឌ្ឍន៍ខ្លួនបង្កើតស្នាដៃថ្មីប្លែក ប្រកបដោយភាពច្នៃប្រឌិតដើម្បីបម្រើការកម្សាន្តរបស់ទស្សនិកជន ហើយលោកពិតជាថ្លែងអំណរគុណចំពោះទស្សនិកជនដែលតែងតែគាំទ្រស្នាដៃសិល្បករខ្មែរ និងអរគុណសម្រាប់អ្នកផលិតកម្មវីធីទូរទស្សន៍នានាដែលតែងតែផ្តល់ឱកាសសម្រាប់សិល្បករក្នុងក្រុមFilm Midia ។ ក្នុងនោះក៏នឹងមានបទចម្រៀងច្រៀងឆ្លើយឆ្លងរវាងតារាចម្រៀងស្រស់សង្ហារូបនេះនិឹងតារាចម្រៀងស្រីដែលកំពុងនៅកម្ពុជាផងដែរ៕
ដោយ៖ វឌ្ឍនា
