កម្លាំងសុីម៉ាក់ CMAC ចុះយកគ្រាប់ប្រភេទទម្លាក់ពីលើយន្តហោះចាស់ៗមិនទាន់ផ្ទុះ៦គ្រាប់ទុកកម្ទេចចោល

ខេត្តកំពង់ឆ្នាំង ៖ កម្លាំងនគរបាលស្រុកបរិបូណ៍ សហការជាមួយកម្លាំងអង្គភាពកំចាត់មីនសុីម៉ាក់ CMAC បានចុះយកគ្រាប់ចាស់ៗមិនទាន់ផ្ទុះ ជាប្រភេទគ្រាប់ទម្លាក់ពីលើយន្តហោះកាលពីសម័យសង្រ្គាមបានចំនួន ០៦គ្រាប់ ដែលនៅរាយប៉ាយតាមដីស្រែចម្ការរបស់ប្រជាពលរដ្ឋ។

ប្រតិបត្តិការនេះធ្វើឡើង នៅសៀលថ្ងៃអង្គារ ទី៣១ ខែសីហា ឆ្នាំ២០២១ នៅភូមិក្បាលដំរី ឃុំត្រពាំងចាន់ ស្រុកបរិបូណ៍ ខេត្តកំពង់ឆ្នាំង ក្រោយពីប្រជាពលរដ្ឋភ្ជួរដីធ្វើស្រែចម្ការបានប្រទះឃើញហើយរាយការណ៍ប្រាប់សមត្ថកិច្ចមូលដ្ឋាន។

មន្ត្រីស៊ីម៉ាក់បានឲ្យដឹងថា គ្រាប់យុទ្ធភ័ណ្ឌមិនទាន់ផ្ទុះនេះជាប្រភេទគ្រាប់ផលិតនៅសហរដ្ឋអាម៉េរិកដែលទម្លាក់ពីលើយន្តហោះកាលក្នុងសម័យសង្រ្គាម។ បច្ចុប្បន្នវាចាស់បន្តិចមែនតែនៅមានគុណភាពអាចផ្ទុះបង្កគ្រោះថ្នាក់ដល់អាយុជីវិតមនុស្សបាន។ដូច្នេះ ស៊ីម៉ាក់ត្រូវរក្សាឲ្យបានគត់មត់ដើម្បីកម្ទេចចោល៕

ដោយ ៖ ប្រាថ្នា