សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ ហេតុការណ៍គួរឱ្យរន្ធត់មួយ បានកេីតឡេីងបន្ទាប់ពីយុវជនម្នាក់ បានជិះម៉ូតូដួលចូលក្រោមរថយន្ត កិនអូសជាច្រើនម៉ែត្របណ្តាលឱ្យស្លាប់យ៉ាងអាណោចអាធ័ម កាលពីព្រឹកថ្ងៃទី៥ ខែធ្នូ ឆ្នាំ២០២១នេះ នៅលើផ្លូវជាតិលេខ៤ ចន្លោះគីឡូម៉ែត្រលេខ៨០-៨១ ត្រង់ចំណុចភូមិពាមទុង ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។
បេីតាមប្រភពព័ត៍មានពីមន្រ្តីនគរបាលខេត្តកំពង់ស្ពឺ បានឱ្យដឹងថា សាកសពមានឈ្មោះ ពិន រ៉ាន់ ភេទប្រុស អាយុ១៤ឆ្នាំ រស់នៅភូមិដំណាក់ត្រាច ឃុំដំបូករូង ស្រុកភ្នំស្រួច ខេត្តកំពង់ស្ពឺ ដោយមុនពេលកើតហេតុ គេឃើញជនរងគ្រោះម៉ូតូមួយគ្រឿងម៉ាកហុងដាឌ្រីម សេ១២៥ ពណ៌ខ្មៅ ពាក់ស្លាកលេខភ្នំពេញ1FO-2293 បើកបរពីកើតទៅលិច លុះមកដល់ចំណុចខាងលើ ក៏បានរេចង្កូតដួលចូលក្រោមរថយន្តមួយគ្រឿង មិនស្គាល់ម៉ាក អ្នកបើកបរមិនស្គាល់អត្តសញ្ញាណ ដែលកំពុងបើកបរបញ្ច្រាសទិសគ្នា អូសជាច្រើនម៉ែត្របណ្តាលឱ្យអ្នកបើកម៉ូតូស្លាប់ភ្លាមៗតែម្តង។
មន្រ្តីដដែលបន្តថា ក្រោយកើតហេតុ សពយុវជនឈ្មោះ(ពិន រ៉ាន់)បានប្រគល់ជូនសាច់ញាតិយកទៅធ្វើបុណ្យតាមប្រពៃណី។ ចំណែកវត្ថុតាងម៉ូតូ បានយកមករក្សាទុកនៅប៉ុស្តិ៍នគរបាលរដ្ឋបាលអូរ រងចាំសមត្ថកិច្ចធ្វេីការស្រាវជ្រាវរករថយន្តដែលកិនជនរងគ្រោះ ដេីម្បីដោះស្រាយនៅពេលក្រោយ៕
ដោយ៖សហការី
