សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ តារាកំប្លែងមួយរូបរបស់ស្ថានីយទូរទស្សន៍ CTN នាយត្បែងបានទទួលមរណភាពនៅព្រឹកថ្ងៃទី១៥ ខែ កុម្ភៈ ឆ្នាំ២០២២ នេះ ដោយជួបគ្រោះថ្នាក់ចរាចរណ៍។ ដំណឹងនេះបានធ្វើឱ្យអ្នករួមអាជីពបានបង្ហោះសារសោកស្តាយជាពន់ពេក។
យោងតាមគណនីហ្វេសប៊ុកឈ្មោះ ហង្ស សំណាង បានបញ្ជាក់យ៉ាងខ្លីថា៖ “នាយត្បែងជាតារាកំប្លែងដ៏កំសត់មួយរូបនៅក្នុងស្ថានីយទូរទស្សន៍ CTN ត្រូវបានលាខ្ញុំនិងលាបងប្អូនទាំងអស់គ្នាជាអ្វីដែលមិននឹកស្មាន។ សូមជូនពរសម្លាញ់ទៅកាន់សុគតិភពកុំបីអាក់ខានឡើយ”។ ប្រភពដដែលឱ្យដឹងទៀតថា នាយត្បែង បានជួបគ្រោះថ្នាក់ចរាចណ៍ដោយជិះម៉ូតូបុកគោមួយក្បាលកាលពីសប្ដាហ៍មុន ខណៈធ្វើដំណើរចេញទៅច្រៀងនៅឯខេត្តស្វាយរៀង ហើយលោកត្រូវបានយកទៅសម្រាកព្យាបាលនៅមន្ទីរពេទ្យក្រោយជួបគ្រោះថ្នាក់ភ្លាមៗ។ តែគួរឱ្យសោកស្ដាយ ដោយសារស្ថានភាពរបួសធ្ងន់ធ្ងរពេក រាងកាយមិនអាចទ្រាំទ្រទៀតបាន នាយត្បែងបានទទួលមរណភាពនៅព្រឹកថ្ងៃថ្ងៃទី១៥ ខែកុម្ភៈ ឆ្នាំ២០២២នេះ ដោយបន្សល់នូវការសោកស្ដាយ អាឡោះអាល័យពីក្រុមគ្រួសារសាច់ញាតិ។
មុននេះគេក៏សង្កេតឃើញមានសិល្បកររួមអាជីព និងក្រុមតន្ត្រីករជាច្រើនរស់នៅក្នុងខេត្តស្វាយរៀងដែលធ្លាប់បានស្គាល់និងស្រលាញ់រាប់អាននាយត្បែងក៏បានរួមគ្នារៃអង្គាសប្រាក់បានមួយចំនួនជួយដល់នាយត្បែង និងភរិយាដែលបានជួបគ្រោះថ្នាក់ចរាចរណ៍ និងបានយកទៅសង្គ្រោះបន្ទាន់នៅមន្ទីរពេទ្យមួយក្នុងរាជធានីភ្នំពេញ ប៉ុន្តែដោយសារស្ថានភាពរងរបួសធ្ងន់ធ្ងរពេកធ្វើឱ្យតារាកំប្លែងរូបនេះទទួលមរណភាពនៅថ្ងៃនេះតែម្តង៕
ដោយ ៖ វឌ្ឍនា
