សារព័ត៌មាន នគរវត្ត តែងតែនាំមុខគេជានិច្ច
ក្លិបបាល់ទាត់បិសាចក្រហម Manchester United កំពុងបញ្ចុះបញ្ចូលលោក Mauricio Pochettino ដែលគាត់គឺជាជម្រើសទី១ ក្នុងការចូលកាន់តំណែងជាអ្នកចាត់ការទូទៅនៅចុងបញ្ចប់នៃរដូវកាលនេះ។ លោក Pochettino និងគ្រូបង្វឹកក្លិប Ajax លោក Erik ten Hag គឺជាគូប្រជែងឈានមុខគេ ខណៈគ្រូបង្វឹក Real Madrid លោក Carlo Ancelotti ស្ថិតក្នុងចំណោមឈ្មោះផ្សេងទៀតដែលត្រូវបានផ្សារភ្ជាប់ជាគ្រូបង្វឹក។
លោក Pochettino នឹងត្រូវមានអារម្មណ៍ថា គាត់គឺជាបេក្ខជននាំមុខគេរបស់ក្លិបមុនពេលយល់ព្រមផ្ទេរទៅ Old Trafford នៅរដូវកាលក្រោយ។ពេលវេលារបស់បុរសសញ្ជាតិអាហ្សង់ទីននៅ Paris Saint-Germain រូបនេះជិតដល់ទីបញ្ចប់ហើយ បន្ទាប់ពីការប្រកួតកាលពីថ្ងៃពុធទល់នឹងក្រុម Real Madrid ក្នុងក្របខ័ណ្ឌ Champions League បានធ្លាក់ត្រឹមវគ្គ១៦ក្រុមចុងក្រោយ។
ម្ចាស់ក្លិប PSG ដែលខឹងសម្បារ លោក Nasser Al-Khelaifi បានត្រៀមខ្លួនរួចជាស្រេចក្នុងការបណ្តេញគ្រូបង្វឹកវ័យ៥០ឆ្នាំរូបនេះ ដែលបាននិយាយក្រោយការប្រកួតថា “បច្ចុប្បន្នគឺជាអ្វីដែលខ្ញុំអាចដោះស្រាយបាន ចំពោះអនាគតនឹងទៅជាយ៉ាងណា?”។
លោក Pochettino នឹងមិនខ្វះការផ្តល់ជូនឡើយ ប្រសិនបើគាត់ចាកចេញពី PSG ហើយចង់បានការធានាថា Man Utd មើលឃើញគាត់ជាជម្រើសដំបូង។ ក្លិបបិសាចក្រហមត្រូវបានផ្សារភ្ជាប់ជាមួយនឹងលោក Pochettino បន្ទាប់ពីបណ្តេញលោក Ole Gunnar Solskjaer កាលពីខែវិច្ឆិកា ប៉ុន្តែបានបរាជ័យបន្ទាប់ពីគាត់នៅបន្តដឹកនាំក្លិបយក្សរបស់បារាំង PSG ។
អតីតគ្រូបង្វឹកក្រុម Tottenham រូបនេះមានបំណងចង់ត្រឡប់ទៅប្រទេសអង់គ្លេសវិញដោយបានដឹកនាំ PSG រយៈពេល១៤ខែចុងក្រោយ ខណៈដែលគ្រួសាររបស់គាត់បានស្នាក់នៅក្នុងទីក្រុងឡុង ប៉ុន្តែប្រភពចេញពីOld Trafford បានបញ្ជាក់ថា លោក Ten Hag ដែលបច្ចុប្បន្នជាគ្រូបង្វឹក្លិបAjax អាយុ៥២ឆ្នាំបានលេចចេញជាគូប្រជែងពិតប្រាកដសម្រាប់ការងារជាគ្រូបង្វឹកដែរ។
ក្រុមបិសាចក្រហម Manchester United ធ្វើជាម្ចាស់ផ្ទះទទួលក្រុម Tottenham នៅថ្ងៃសៅរ៍នេះដែលត្រូវប្រឈមមុខនឹងការប្រជែងយកចំណាត់ថ្នាក់កំពូលទាំង៤នៅ Premier League ៕
ដោយ៖ ភារៈ(រូបភាព ៖ dailymail.com)
