សារព័ត៌មាន នគរវត្ត តែងតែនាំមុខគេជានិច្ច
ខេត្តឧត្តរមានជ័យ៖ កសិករមួយក្រុមមិនស្គាល់សត្វខ្ទីងស្មានតែសត្វក្របី ក៏នាំគ្នារត់ទៅដេញ ស្រាប់តែសត្វខ្ទីងដេញវ័ធ បណ្តាលឲ្យកសិករម្ចាស់ចម្ការដំឡូង៣នាក់របួសធ្ងន់ស្រាល ស្ថិតនៅចំណុចភូមិសិទ្ធសេរី ឃុំគោកមន ស្រុកបន្ទាយអំពិល ខេត្តឧត្តរមានជ័យ កាលពីថ្ងៃទី៣០ ខែមីនា ឆ្នាំ២០២២។
ប្រភពព័ត៌មាន បានឱ្យដឹងថា ជនរងគ្រោះ៣នាក់ដែលមាន ប្រុស២នាក់ ស្រី១ ពួកគាត់ជាប្រជាកសិករធ្វើចំការដំឡូង ហើយពួកគាត់មិនស្គាល់សត្វខ្ទីងស្មានតែសត្វក្របី ក៏បានទៅដេញ។ តែក្រោយមក សត្វខ្ទីងនោះបានដេញវ័ធពួកគាត់វិញបណ្តាលឲ្យរងរបួសធ្ងន់ស្រាលទាំង ៣នាក់ ត្រូវបានបញ្ជូនយកមកសម្រាកព្យាបាលនៅមន្ទីរពេទ្យបង្អែកខេត្តឧត្តរមានជ័យ។
លោក អាន សាមិត្ត អភិបាលរងស្រុកបន្ទាយអំពិល រួមទាំងកម្លាំងមន្ត្រីអភិរក្សមន្ទីរបបរិស្ថានខេត្ត,កម្លាំងសឹករងបន្ទាយអំពិល និងកម្លាំងអធិការដ្ឋាននគរបាលស្រុកបានហ៊ុមព័ទ្ធឃ្លាំចាំមើលចំពោះសត្វខ្ទីងនេះ ដោយមានការប្រយ័ត្នខ្ពស់តែមិនអាចចាប់បាន រងចាំកម្លាំងជំនាញអភិរក្សសួនសសត្វមកចាប់ផ្ទាល់។
បច្ចុប្បន្នសត្វខ្ទីង១ក្បាលនោះវាបានសំងំនៅក្នុងព្រៃជាប់ចំការដំឡូងមួយកន្លែងស្ថិតនៅខាងកើតភូមិសិទ្ធសេរី ដោយមានការ ការពារពីកងកម្លាំងផងដែរ៕
ដោយ៖ សូរិយា
