សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ ៖ គ្រោះថ្នាក់ចរាចរណ៍មួយរវាងអ្នកជិះម៉ូតូទៅបុករថយន្តបណ្តាលឲ្យបុរសម្នាក់រងរបួសធ្ងន់នៅវេលាម៉ោង៧និង១៥នាទីព្រឹកថ្ងៃទី ១៩ ខែឧសភា ឆ្នាំ ២០២២ លើកំណាត់ផ្លូវជាតិលេខ៥ ស្ថិតក្នុងភូមិសែសិន សង្កាត់អូរអំបិល ក្រុងសិរីសោភ័ណ ។
មន្ត្រីនគរបាលចរាចរណ៍បានឲ្យដឹងថា៖ នៅមុនពេលកើតហេតុ រថយន្តម៉ាកតូយ៉ូតា១បាំងកន្លះ ពណ៌បៃតង ពាក់ស្លាក ភ្នំពេញ. 2A 6735 បើកបរដោយឈ្មោះ លី ថាន់ណា ភេទប្រុសអាយុ៣១ឆ្នាំ នៅភូមិរោងម៉ាស៊ីន សង្កាត់អូរអំបិល ក្រុងសិរីសោភ័ណ បានធ្វើដំណើរក្នុងទិសដៅពីជើងទៅត្បូងហួសផ្លូវចូលរោងចក្រទឹក រថយន្តប្តូរគន្លងទិសបត់ឆ្វេង ស្របពេលនោះមានម៉ូតូ០១គ្រឿងម៉ាកស៊ុយហ្ស៊ុយគីវីវ៉ា ពណ៌ខ្មៅ គ្មានស្លាកលេខ អ្នកបើកបរមិនស្គាល់អត្តសញ្ញាណ បើកក្នុងល្បឿនលឿន បានបុកចំកង់រថយន្តខាងមុខផ្នែកខាងឆ្វេងពេញទំហឹង បណ្តាលឲ្យអ្នកបើកបរម៉ូតូរងរបួសក្បាល និងជើង ត្រូវបានរថយន្តសង្រ្គោះរបស់ស្នងការដ្ឋាននគរបាលខេត្ត ដឹកទៅសង្រ្គោះនៅមន្ទីរពេទ្យបង្អែកក្រុងសិរីសោភ័ណ។រីឯម៉ូតូខូចខាតធ្ងន់ រថយន្តខូចខាតស្រាល ។
នគរបាលជំនាញបានបញ្ជាក់ថា៖ មូលហេតុបង្កឲ្យកើតមានគ្រោះថ្នាក់ បណ្តាលមកពីអ្នកបើកបរម៉ូតូមានល្បឿនលឿន ចំណែកអ្នកបើករថយន្តប្តូរទិសបត់ឆ្វេងខ្វះការប្រុងប្រយ័ត្ន ។ ចំពោះវត្ថុតាងរថយន្តនិងម៉ូតូ សមត្ថកិច្ចយកមករក្សាទុកនៅការិយាល័យនគរបាលចរាចរណ៍ខេត្ត ដើម្បីធ្វើការដោះតាមផ្លូវច្បាប់ ៕
ដោយ ៖ វណ្ណា
