លោក រ័ត្ន ស្រ៊ាង បានអញ្ជើញជាអធិបតី ក្នុងពិធីប្រគល់សមិទ្ធផលនានាក្នុងសាលាបឋមសិក្សា កែវ មុនី សង្កាត់ព្រែកកំពឹស

ភ្នំពេញ៖ នៅព្រឹកថ្ងៃទី១៩ ខែឧសភា ឆ្នាំ២០២២ លោក រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ រួមជាមួយក្រុមការងារក្រោមឱវាទ បានចុះជួបសំណេះសំណាលជាមួយលោកគ្រូ អ្នកគ្រូ មាតាបិតា អាណាព្យាបាល សិស្សានុសិស្ស និងប្រគល់សមិទ្ធផលនានាក្នុងសាលាបឋមសិក្សា កែវ មុនី សង្កាត់ព្រែកកំពឹស ដែលរូបលោកបានជួយឧបត្ថម្ភ ជួសជុល កែលម្អ និងកសាងរួចរាល់ជូនដល់លោកគ្រូអ្នកគ្រូនិងសិស្សានុសិស្សប្រើប្រាស់ជាផ្លូវការ ដែលក្នុងនោះរួមមាន៖ 

– ចាក់ដី ចាក់កម្ទេចថ្ម និងខ្សាច់បំពេញក្នុងទីតាំងសាលាទាំងមូលចំនួន១៩២ឡាន។

– ចាក់សាបបេតុងលើទីធ្លាសាលាទាំងមូលទំហំ១,១៨៨ម៉ែត្រការ៉េ ។

– រៀបការ៉ូឡាជុំវិញបរិវេណទីធ្លា និងដងទង់ជាតិទំហំ២១០ម៉ែត្រការ៉េ ។

– ជួសជុលកែលម្អសួនច្បារ ដងទង់ជាតិ ដាំផ្កាឡើងវិញ និងដាំដើមឈើធ្នង់បន្ថែមចំនួន៣៥ដើម ។

– ជួលជុលខ្លោងទ្វារ របង បន្ទប់ទឹក ចាក់សាបបាតអគារនិងលាបថ្នាំអគារឡើងវិញទាំងអស់ ។

– ធ្វើរោងសម្រាប់ដាក់ម៉ូតូ កង់ ធ្វើតារាងបាល់បោះ រៀបចំសួនកម្សាន្តនិងបំពាក់ឧបករណ៍ក្មេងលេងក្នុងបរិវេណសាលា។

– កសាងប្រព័ន្ធលូរំដោះទឹកក្នុងបរិវេណសាលាទាំងមូលដោយធានាបាន១០០%។ 

    លោក រ័ត្ន ស្រ៊ាង បានថ្លែងឱ្យដឹងថា មានសន្តិភាពគឺមានការអភិវឌ្ឍ មានសិទ្ធិសេរីភាព និងមានអ្វីៗទាំងអស់ ក្រោមការដឹកនាំដ៏ឈ្លាសវៃប្រកបដោយបញ្ញាញាណរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលសម្តេចធ្លាប់បានយកជីវិតធ្វើដើមទុន ឆ្ពោះទៅរកការរំដោះជាតិឱ្យរួចផុតពីរបបវាលពិឃាត ជាពិសេសសម្តេចបានដាក់ចេញនូវនយោបាយ ឈ្នះ=ឈ្នះ រំលាយបានទាំងស្រុងនូវអង្គការចាត់តាំងនយោបាយនិងយោធាខ្មែរក្រហម ទើបនាំយកនូវសន្តិភាពពេញលេញជូនជាតិមាតុភូមិកម្ពុជា ក៏ដូចជាប្រជាជនខ្មែរទូទាំងប្រទេសដូចសព្វថ្ងៃ និងបានអភិវឌ្ឍប្រទេសជាតិឱ្យមានភាពរីកចម្រើនជាបន្តបន្ទាប់លើគ្រប់វិស័យ។ ជាក់ស្តែង ការកសាងសមិទ្ធផលក្នុងសាលា ផ្តល់ឱកាសឱ្យសិស្សានុសិស្សបានរៀនសូត្រគ្រប់កម្រិតដោយគ្មានការព្រួយបារម្ភនាថ្ងៃនេះក៏បានមកពីសន្តិភាពដែលសម្តេចតេជោ និងឥស្សរជនថ្នាក់ដឹកនាំគ្រប់រូប ប្រឹងប្រែងរកបានមកដោយលំបាក។ លើសពីនេះ ដោយមានទស្សនៈវិស័យវែងឆ្ងាយរបស់សម្តេចអគ្គមហាសេនាបតីតេជោ ហ៊ុន សែន បានធ្វើឱ្យកម្ពុជាឆ្លងផុតនូវគ្រោះមហន្តរាយនៃជំងឺឆ្លងកូវីដ-១៩យ៉ាងឆាប់រហ័ស ធ្វើឱ្យការរស់នៅប្រកបរបរចិញ្ចឹមជីវិត ការសិក្សា ការដើរកម្សាន្ត និងការប្រាស្រ័យទាក់ទងគ្នាក្នុងសង្គមត្រឡប់មកប្រក្រតីវិញ។ 

   លោក រ័ត្ន ស្រ៊ាង បានសម្តែងនូវទឹកចិត្ត​ សប្បាយ​រីករាយ​បំផុត ដែលបានមកជួបសំណេះសំណាលដោយផ្ទាល់ និប្រគល់​​ដាក់​ឲ្យ​ប្រើប្រាស់នូវសមិទ្ធផលនានាក្នុងសាលាបឋមសិក្សា កែវ មុនី ក្នុងថ្ងៃនេះ​។ ក្នុងឱកាសនោះផងដែរ លោកក៏បាននាំយកអាហារសម្រន់ទៅទទួលទានជាមួយ សមាជិក សមាជិកា សិស្សានុសិស្ស ដែលចូលរួមទាំងអស់ក្រោមបរិយាកាសរីករាយ ប្រកបដោយ មនោសញ្ចេតនាស្និទ្ធស្នាលក្រៃលែង ព្រមទាំងបានឧបត្ថម្ភថវិកា សម្ភារសិក្សា ខោអាវកីឡាជូនដល់លោកគ្រូអ្នកគ្រូ សិស្សានុសិស្សព្រមទាំងអាណាព្យាបាលសិស្ស គ្រប់ៗគ្នា រួមមាន៖

– ជូនថវិកាដល់លោកគ្រូ អ្នកគ្រូ ចំនួន០៣សាលាក្នុងសង្កាត់ព្រែកកំពឹស ស្មើនឹង១១១នាក់ ម្នាក់ៗទទួលបានថវិកា ៥ម៉ឺនរៀល ។

– មាតាបិតាអាណាព្យាបាលសិស្ស យុវជន (សសយក)សង្កាត់ សរុបចំនួន ១៩៣នាក់ ម្នាក់ៗទទួលបានថវិកា២ម៉ឺនរៀល។

– សិស្សបឋមសិក្សាចំនួន៤៥០នាក់ ម្នាក់ៗទទួលបាន សៀវភៅ០១ក្បាល ប៊ិក០១ ដើម ខ្មៅដៃ០១ដើម និងថវិកា៥ពាន់រៀល។

– កុមារា កុមារី ចាប់ពីអាយុ២ឆ្នាំ រហូតដល់យុវជនរៀនមហាវិទ្យាល័យដែលរស់នៅក្នុងទូទាំងសង្កាតព្រែកកំពឹសក៏ដូចជាសិស្សរស់នៅក្រៅមូលដ្ឋានដែលបានមករៀននៅសាលាទាំង០៣ ក្នុងសង្កាត់ព្រែកកំពឹស សរុប ៤,២៨៥ នាក់ ក្នុងម្នាក់ៗ ទទួលបានខោអាវកីឡា១កំប្លេគ្រប់ៗគ្នា៕

ដោយ៖ចន្ទ លីហ្សា