សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ដូចដែលការគ្រោងទុក ក្រសួងការងារនិងបណ្ដុះបណ្ដាលវិជ្ជាជីវៈនិងស្ថាប័នពាក់ព័ន្ធបានបន្តបើកកិច្ចប្រជុំដើម្បីជជែកពិភាក្សាអំពីបញ្ហាប្រាក់ឈ្នួលអប្បបរមារបស់កម្មករ,កម្មការិនី។ នៅមានកិច្ចប្រជុំច្រើនលើកទៀតមុននឹងឈានដល់ការព្រមព្រៀងផ្លូវការមួយដែលគេរំពឹងថាអាចនឹងចេញជាលទ្ធផលនៅអំឡុងចុងខែកញ្ញាឬនៅមុនរដូវភ្ជុំបិណ្ឌពេលខាងមុខ។
នៅព្រឹកថ្ងៃទី២៤ ខែសីហា ឆ្នាំ២០២២នេះក្រសួងការងារ និងបណ្តុះបណ្តាលវិជ្ជាជីវៈ បានបើកកិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមាអាណត្តិទី២ ឆ្នាំ ទី២ ដើម្បីប្រមូលទិន្នន័យ និងព័ត៌មានពីគ្រប់ភាគីពាក់ព័ន្ធ ដើម្បីធ្វើជាមូលដ្ឋាន សម្រាប់ពិភាក្សាស្វែងរកយន្តការឯកភាពមួយ ដែលនឹងលើកយកទៅពិភាក្សាគ្នានៅពេលក្រោយទៀត។ កិច្ចប្រជុំបានពិភាក្សាពីបញ្ហាបច្ចុប្បន្នភាពនៃស្ថានភាពរស់នៅរបស់កម្មករ,កម្មការិនីតាមបណ្ដារោងចក្រនានាពាក់ព័ន្ធនឹងបញ្ហាអតិផរណាជាមួយប្រាក់ឈ្នួលរបស់កម្មករ។
កិច្ចប្រជុំពិភាក្សាអំពីប្រាក់ឈ្នួលអប្បបរមា ជូនកម្មករនិយោជិតក្នុងវិស័យវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប សម្រាប់ឆ្នាំ២០២៣ នៅព្រឹកថ្ងៃនេះ ដឹកនាំដោយលោក ហេង សួរ រដ្ឋលេខាធិការក្រសួងការងារ និងបណ្តុះ បណ្តាលវិជ្ជាជីវៈ និងសមាជិកក្រុមប្រឹក្សាជាតិប្រាក់ ឈ្នួលអប្បបរមា ដោយមានការចូលរួមជាត្រីភាគី (មួយក្រុមមាន ១៧នាក់) រួមមាន ភាគីរដ្ឋាភិបាល ភាគីសហ ជីពតំណាងកម្មករនិយោជិត និងភាគីនិយោជក។ កិច្ច ពិភាក្សាបានជជែកវែកនិយាយយ៉ាងល្អិតល្អន់អំពីបញ្ហាបច្ចុប្បន្នភាពដែលជាស្ថានភាពនៃការរស់នៅរបស់កម្មករកម្មការិនីក្នុងបរិបទនៃជំងឺកូវីដ១៩នោះផង។
គួរបញ្ជាក់ថា គិតចាប់ពីឆ្នាំ១៩៩៧ កម្មករនិយោជិតដែលបំពេញការក្នុងវិស័យឧស្សាហកម្មកាត់ដេរមានចំនួន ៤៥ដុល្លារអាម៉េរិក និងកើនឡើងជាបន្តបន្ទាប់ចំនួន ១៩៤ដុល្លារអាម៉េរិក ក្នុងមួយខែ។ គិតជាមធ្យម បូកទាំងប្រាក់ឈ្នួលអប្បបរមា ប្រាក់ថែមម៉ោងការងារ និងប្រាក់ឧបត្ថម្ភផ្សេងៗទៀត កម្មករនិយោជិតក្នុងមួយនាក់ អាចទទួលប្រាក់ខែចន្លោះ ២៥០ទៅ៣០០ដុល្លារ ឬឈានដល់៣៥០ដុល្លារ នៅក្នុងមួយខែៗ។
គិតត្រឹមខែកក្កដា ឆ្នាំ២០២២ បច្ចុប្បន្នភាពសហគ្រាស គ្រឹះស្ថាន វិស័យកាត់ដេរ និងផលិតស្បែកជើង មានចំនួន ១ ១៨២ ស្មើនឹងកម្មករនិយោជិតសរុបចំនួនជាង ៨៣ម៉ឺននាក់៕
ដោយ៖ សូរិយា
