សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កម្លាំងជំនាញព្រហ្មទណ្ឌ សហការជាមួយកម្លាំងប៉ុស្ដិ៍នគរបាលរដ្ឋបាលបឹងកេងកងទី២ កាលពីវេលាម៉ោង១២និង២០នាទីរំលងអធ្រាត្រឈានចូលថ្ងៃទី២៩ ខែសីហា ឆ្នាំ២០២២ បានធ្វើការឃាត់ខ្លួនជនសង្ស័យម្នាក់ពីបទលួចមានស្ថានទម្ងន់ទោស(ឆក់យកទូរសព្ទដៃ) នៅចំណុចមុខផ្ទះលេខ២០២ ផ្លូវលេខ៣១០ ភូមិ៥ ក្រុម៣៩ សង្កាត់បឹងកេងកងទី២ ខណ្ឌបឹងកេងកង រាជធានីភ្នំពេញ។
ជនសង្ស័យឈ្មោះ ប៉ូ ពេជ្រ ហៅអាពេជ្រ ភេទប្រុស អាយុ២២ឆ្នាំ ជនជាតិខ្មែរ មានទីលំនៅបច្ចុប្បន្នផ្ទះជួលគ្មានលេខ ផ្លូវលំ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ មុខរបរមិនពិតប្រាកដ (មានសារធាតុញៀន) ។
ចំណែកវត្ថុតាងចាប់យក៖
-ម៉ូតូ០១គ្រឿងម៉ាក Nex ស៊េរីឆ្នាំ2017 ពណ៌ស ពាក់ស្លាកលេខ ភ្នំពេញ 1FL-9003 លេខតួនិងលេខម៉ាស៊ីនAE52-315752 (ជារបស់ជនសង្ស័យ) ។
យោងតាមប្រភពព័ត៌មានពីលោកវរសេនីយ៍ឯក ស៉ឹម ពិសិដ្ឋ អធិការនគរបាលខណ្ឌបឹងកេងកងបានឱ្យដឹងថា នៅថ្ងៃទី២៨ខែសីហាឆ្នាំ២០២២ វេលាប្រហែលម៉ោង១១និង៣០នាទីយប់ ជនសង្ស័យខាងលើជិះម៉ូតូ០១គ្រឿងម៉ាក Nexសេ៊រីឆ្នាំ 2017ពណ៌ស ពាក់ស្លាកលេខ ភ្នំពេញ 1FL-9003 តែម្នាក់ឯងចេញពីផ្ទះជួលនៅម្ដុំសង្កាត់ចាក់អង្រែលើ ខណ្ឌមានជ័យក្នុងគោលបំណងជិះម៉ូតូធ្វើសកម្មភាពឆក់តាមដងផ្លូវ។
លុះជនសង្ស័យជិះម៉ូតូមកដល់ចំណុចមុខផ្ទះលេខ២០២ ផ្លូវលេខ ៣១០ ភូមិ៥ក្រុម៣៩ សង្កាត់បឹងកេងកងទី២ ខណ្ឌបឹងកេងកង (កន្លែងកើតហេតុ) បានឃើញជនរងគ្រោះកំពុងចុចទូរស័ព្ទដៃក្នុងឡំប្រឺតាដែលជិះស្របទិសគ្នា ជនសង្ស័យក៏ជិះម៉ូតូទៅអែបខាងស្ដាំដៃឡំប្រឺតារួចក៏ធ្វើសកម្មភាពឆក់យកទូរស័ព្ទដៃរបស់ជនរងគ្រោះបានសម្រេចក៏ជិះគេចបានប្រហែល២០ម៉ែត្រក៏អកហ្សឺនឹងម៉ូតូគេធ្វើដំណើរតាមដងផ្លូវបណ្ដាលឱ្យដួល ស្របពេលនោះសមត្ថកិច្ចមូលដ្ឋានយើងល្បាតទៅដល់ក៏ធ្វើការឃាត់ខ្លួនជនសង្ស័យ រួមនឹងវត្ថុតាងយកមកសាកសួរនៅប៉ុស្ដិ៍នគរបាលរដ្ឋបាលបឹងកេងកងទី២តែម្ដង។
បច្ចុប្បន្នជនសង្ស័យ រួមនឹងវត្ថុតាង បានឃាត់នៅអធិការដ្ឋាននគរបាលខណ្ឌបឹងកេងកងជាបណ្ដោះអាសន្ន ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមនីតិវិធីច្បាប់៕
ដោយ៖ ជីណា
