សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ កម្លាំងល្បាតរបស់ការិយាល័យព្រហ្មទណ្ឌកម្រិតស្រាល នៃនាយកដ្ឋានព្រហ្មទណ្ឌ ដឹកនាំដោយលោកវរសេនីយ៍ឯក ប៊ុត វណ្ណរដ្ឋ បានធ្វើការឃាត់ខ្លួនជនសង្ស័យម្នាក់ បន្ទាប់ពីជនល្មើសរូបនេះជិះម៉ូតូមួយគ្រឿង ធ្វើសកម្មភាពឆក់កាបូបពីស្ត្រីម្នាក់បានសម្រេចនៅតាមដងផ្លូវ កាលពីរសៀល ថ្ងៃទី៣០ ខែកញ្ញា ឆ្នាំ២០២២ ស្ថិតនៅត្រង់ចំណុចមុខផ្ទះលេខ១៧៣Eo ក្នុងសង្កាត់បឹងសាឡាង ខណ្ឌទួលគោក រាជធានីភ្នំពេញ។
សមត្ថកិច្ចបានឱ្យដឹងថា ជនសង្ស័យខាងលើមាន ឈ្មោះ ទូច វិចិ្ឆកា ភេទប្រុស អាយុ ២២ឆ្នាំ ជនជាតិខ្មែរ ជាបុគ្គលិកបម្រើការងារនៅក្លឹបមួយកន្លែង និងបានស្នាក់នៅម្តុំផ្លូវបេតុង ក្នុងសង្កាត់គោករកា ខណ្ឌព្រែកព្នៅ។
សមត្ថកិច្ចបានបញ្ជាក់ឱ្យដឹងទៀតថា នៅថ្ងៃទី៣០ ខែកញ្ញា ឆ្នាំ២០២២ កម្លាំងល្បាតរបស់ការិយាល័យព្រហ្មទណ្ឌកម្រិតស្រាល នៃនាយកដ្ឋានព្រហ្មទណ្ឌ ដឹកនាំដោយលោកវរសេនីយ៍ឯក ប៊ុត វណ្ណរដ្ឋ បានចេញដើរល្បាតនៅតាមបណ្ដោយផ្លូវ២១៧ មុខផ្ទះលេខ១៧៣Eo ក្នុងសង្កាត់បឹងសាឡាង ខណ្ឌទួលគោក ក៏ស្រាប់តែប្រទះឃើញជនសង្ស័យម្នាក់ ជិះម៉ូតូមួយគ្រឿង បានធ្វើសកម្មភាពឆក់កាបូបស្ពាយពីនារីរងគ្រោះ កំពុងតែជិះម៉ូតូតាមបណ្ដោយផ្លូវខាងលើបានសម្រេច។ ខណៈភ្លាមនោះៗ ខាងកម្លាំងជំនាញ ក៏បានធ្វើការប្រដេញតាមជនសង្ស័យ ហើយជនសង្ស័យ ក៏បានរត់ចូលផ្ទះសំណាក់យីហោ ស្រែពណ៌ បន្ទាប់មកសមត្ថកិច្ច បានធ្វើការឡោមព័ទ្ធ និងបានសហការជាមួយអធិការដ្ឋាននគរបាលខណ្ឌចំការមន ដើម្បីចុះត្រួតពិនិត្យក្នុងបន្ទប់លេខ១០៣ ទើបឃាត់ខ្លួនជនសង្ស័យម្នាក់ ខាងលើនេះបាន។
សម្រាប់សម្ភារ:ដែលដកហូតបានរួមមាន៖ ១-ម៉ូតូមួយគ្រឿង ម៉ាកហុងដា ស្កូពី ពណ៌ស ពាក់ស្លាក លេខ ភ្នំពេញ 1JR-0793 (របស់ជនសង្ស័យ)។ និងទី២-កាបូបស្ពាយពណ៌ខ្មៅ (ជារបស់ជនរងគ្រោះ)។
បច្ចុប្បន្ននេះ សមត្ថកិច្ចជំនាញរបស់ការិយាល័យព្រហ្មទណ្ឌកម្រិតស្រាល នៃនាយកដ្ឋានព្រហ្មទណ្ឌ បាននាំខ្លួនជនសង្ស័យខាងលើ យកទៅធ្វើការសាកសួរ និងកសាងសំណុំរឿង បញ្ជូនទៅអយ្យការអមសាលាដំបូងរាជធានីភ្នំពេញ ដើម្បីចាត់ការបន្តតាមនីតិវិធី៕
ដោយ៖ ភារ៉ា ដង្កោ
