សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរស៣នាក់ជាជនជាតិចិន បានធ្វេីដំណេីររួមគ្នាដោយរថយន្ដស៊េរីទំនើបម៉ាកPORSCHE មួយគ្រឿងក្នុងល្បឿនលឿនហេីយជ្រុលទៅបុកឡេីងខឿនរង្វង់មូលនាងបីកួរស្រូវ បណ្ដាលឱ្យរង្វង់មូលនិងរថយន្តបង្ករងការខូចខាតយ៉ាងដំណំ និងធ្វេីឱ្យបុរស៣នាក់ខាងលេីរងរបួសធ្ងន់ម្នាក់ ស្រាល២នាក់ ។
ហេតុការណ៍គ្រោះថ្នាក់ចរាចរណ៍នេះបានកេីតឡេីងកាលពីវេលាម៉ោង១២ និង៣០នាទីរំលងអធ្រាត្រឈានចូលថ្ងៃទី០៥ ខែវិច្ឆិកា ឆ្នាំ២០២២ ស្ថិតនៅត្រង់ចំណុចរង្វង់មូលនាងបីកួរស្រូវ ក្នុងសង្កាត់រលួស ខណ្ឌដង្កោ រាជធានីភ្នំពេញ ។
តាមប្រភពព័ត៌មានពីកន្លែងកេីតហេតុបានឱ្យដឹងថា នៅពេលកេីតហេតុគេឃេីញរថយន្ដស៊េរីទំនើបម៉ាកPORSCHE ពណ៌ស ពាក់ផ្លាកលេខ ភ្នំពេញ 2AT-7787 ធ្វេីដំណេីរតាមបណ្ដោយផ្លូវលេខ១០៤ ពីលិចទៅកេីតក្នុងល្បឿនលឿន លុះមកដល់ចំណុចកេីតហេតុ រថយន្តបង្កមិនបត់តាមផ្លូវទេបែរជាទៅមុខត្រង់បុកខឿនឡេីងលេីរង្វង់នាងបីកួរស្រូវ រងការខូចខាតខឿននិងដេីមផ្កាលម្អ ព្រមទាំងរថយន្តបង្ករងការខូចខាតយ៉ាងដំណំ ។ ភ្លាមៗនោះស្រាប់តែឃេីញបុរស៣នាក់ដែលជាជនជាតិចិននៅក្នុងរថយន្តបង្កមានម្នាក់រងរបួសធ្ងន់ និង២នាក់ទៀតរងរបួសស្រាល ហេីយពួកគាត់បានទាក់ទងរថយន្តគ្នីគ្នារបស់គាត់មកដឹកជនរងគ្រោះដែលរងរបួសធ្ងន់ទៅកាន់មន្ទីរពេទ្យដោយខ្លួនឯង ដោយបន្សល់រថយន្តបង្កនៅកន្លែងកេីតហេតុ ។
ក្រោយមក សមត្ថកិច្ចមូលដ្ឋានបានចុះមកដល់ និងសហការជាមួយកម្លាំងសមត្ថកិច្ចជំនាញចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ធ្វេីការវាស់វែងយករថយន្តបង្កទៅរក្សាទុករង់ចាំដោះស្រាយតាមច្បាប់នាពេលក្រោយ ៕
ដោយ ៖ ភារ៉ា ដង្កោ
