សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បើយោងតាមការបញ្ជាក់ពីលោកឧត្តមសេនីយ៍ឯក ឆាយ គឹមខឿន អគ្គស្នងការរង និងជាអ្នកនាំពាក្យអគ្គស្នងការដ្ឋាននគរបាលជាតិ បានថ្លែងឱ្យដឹងនៅព្រលប់ថ្ងៃអាទិត្យទី២០ ខែវិច្ឆិកា ឆ្នាំ២០២២នេះថា៖ កម្លាំងនគរបាលទូទាំងប្រទេស បានត្រួតពិនិត្យ និងផាកពិន័យ យានយន្តសរុបចំនួន ១២៩គ្រឿងទៀត នាថ្ងៃទី២០ ខែវិច្ឆិកានេះ។ ក្នុងនោះមានម៉ូតូ ១១០គ្រឿង និងរថយន្ត ១៩គ្រឿង។
ឧត្តមសេនីយ៍ឯក ឆាយ គឹមខឿន គិតត្រឹមថ្ងៃទី២០ ខែវិច្ឆិកា ក្នុងឆ្នាំ២០២២នេះ នគរបាលចរាចរណ៍ទូទាំងប្រទេសបានត្រួតពិនិត្យ និងផាកពិន័យយានយន្តសរុបចំនួន ១៣៧,៥៦៧គ្រឿង ក្នុងនោះមានម៉ូតូ ១១០,៥៨២គ្រឿង និងរថយន្តគ្រប់ប្រភេទ ២៦,៨៥គ្រឿង។
ជាក់ស្ដែងចំពោះបទល្មើសដែលត្រូវបានកត់សម្គាល់សម្រាប់ម៉ូតូរួមមាន៖ មួក ល្មើសសញ្ញា និងអត់ស្លាកលេខជាដើម។ ដោយឡែករថយន្តរួមមាន៖ ល្មើសល្បឿន ខ្សែក្រវាត់ ឆៀក អត់បណ្ណបើកបរ និងសញ្ញាជាដើម។
ដោយឡែកសម្រាប់ថ្ងៃទី២០ ខែវិច្ឆិកា ឆ្នាំ២០២២នេះ គ្រោះថ្នាក់ចរាចរណ៍នៅទូទាំងប្រទេសកម្ពុជាក៏បានកើតឡើងចំនួន ០៧លើក ក្នុងនោះស្លាប់ចំនួន ០៤នាក់ របួសចំនួន ០៧នាក់ (របួសធ្ងន់ ចំនួន ០៥នាក់)។ រយៈពេល៣២៤ថ្ងៃមានករណីគ្រោះថ្នាក់ចរាចរណ៍ចំនួន ២,៦៤៣លើក បណ្ដាលឱ្យមនុស្សស្លាប់ ១,៥៤៤នាក់ របួស ៣,៦០២នាក់ (របួសធ្ងន់ ២,២៨១នាក់)។
ជាមួយគ្នានេះ លោកឧត្តមសេនីយ៍ឯក ឆាយ គឹមខឿន ក៏បានថ្លែងអំណរគុណ និងកោតសរសើរដល់ជនរួមជាតិជាអ្នកប្រើប្រាស់ផ្លូវទាំងអស់ ដែលបានចូលរួមគោរពច្បាប់ចរាចរណ៍យ៉ាងល្អប្រសើររយៈពេលកន្លងមកនេះ ជាពិសេសកោតសរសើរ និងអរគុណដល់នគរបាលចរាចរណ៍ដែលបានលះបង់ និងខិតខំប្រឹងប្រែងជំរុញការរឹតបន្តឹងចរាចរណ៍ប្រកបដោយស្មារតី ទទួលខុសត្រូវខ្ពស់បំផុត៕ ដោយ៖សហការី
