សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ រថយន្តស៊េរីទំនេីបម៉ាកMERCEDES BENZ C300 បេីកបរដោយបុរសម្នាក់ក្នុងល្បឿនយ៉ាងលឿន ខណៈដល់ផ្លូវកែងបួងចង្កូតមិនទាន់ ជ្រុលទៅបុករបងដែកផ្ទះប្រជាពលរដ្ឋបណ្ដាលឲ្យបាក់ខ្ទាតទៅប៉ះរថយន្តLexusដែលចតនៅខាងក្នុងមួយគ្រឿងទៀតរងការខូចខាតយ៉ាងដំណំ ។
ហេតុការណ៍នេះបានកេីតឡេីងកាលពីវេលាម៉ោង១២និង៤០នាទីរំលងអធ្រាត្រឈានចូលថ្ងៃអង្គារ ទី២៧ ខែធ្នូ ឆ្នាំ២០២២ នៅតាមបណ្ដោយផ្លូវ៣៧១សឡា ក្នុងសង្កាត់អូរបែកក្អម ខណ្ឌសែនសុខ រាជធានីភ្នំពេញ។
បេីតាមប្រភពព័ត៌មានពីកន្លែងកើតហេតុបានឱ្យដឹងថា មុនកេីតហេតុគេឃើញរថយន្តម៉ាកMERCEDES BENZ C300 ពណ៌ស ស៊េរីឆ្នាំ២០១៥ ពាក់ស្លាកលេខភ្នំពេញ2BE.6780បើកបរដោយបុរសម្នាក់ធ្វេីដំណេីរតាមបណ្ដោយផ្លូវ៣៧១សឡា ទិសដៅពីជើងមកត្បូងក្នុងល្បឿនលឿនខណៈមកដល់ផ្លូវកែងបួងចង្កូតមកខាងឆ្វេងដៃមិនទាន់ក៏ជ្រុលទៅបុករបងដែកផ្ទះប្រជាពលរដ្ឋបណ្ដាលឲ្យបាក់ ខ្ទាតទៅប៉ះនិងរថយន្តLexus RX330 ពណ៌ស ពាក់ស្លាកលេខ ពោធិ៍សាត់ 2C.5555 ដែលចតខាងក្នុងរបងបណ្តាលឲ្យឆ្កូតថ្នាំផ្នែកខាងក្រោយរថយន្តខូចខាតតិចតួច តែរថយន្តបង្កខូចខាតយ៉ាងដំណំ សំណាងដែរក្នុងគ្រោះថ្នាក់ចរាចរណ៍នេះមិនបង្កឲ្យនរណាម្នាក់រងរបួស ។
ក្រោយកើតហេតុ សមត្ថកិច្ចមូលដ្ឋាន និងជំនាញចរាចរណ៍ខណ្ឌសែនសុខ បានចុះមកដល់កន្លែងកើតហេតុ និងឱ្យភាគីទាំងពីរសម្របសម្រួលគ្នា។ មួយសន្ទុះក្រោយមក ភាគីខាងរថយន្តបង្កបានសងថ្លៃខូចខាតទៅឱ្យម្ចាស់ផ្ទះនិងម្ចាស់រថយន្តរងគ្រោះសរុប៧០០ដុល្លារ ដើម្បីបញ្ចប់រឿង ៕
ដោយ ៖ ភារ៉ា ដង្កោ
