សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ ស្ត្រីម្នាក់បានជីកដំឡូងជ្រូកនៅឯស្រែយកមកស្ងោរហូបជាមួយក្រុមគ្រួសារមិនបានប៉ុន្មានម៉ោងផង ស្រាប់តែមានអាការៈមិនស្រួល បានទៅព្យាបាលនៅមន្ទីរពេទ្យ តែដោយសារអាការៈធ្ងន់ធ្ងរពេក ស្រ្តីម្នាក់បានស្លាប់បាត់បង់ជីវិត រីឯ៣នាក់ទៀតមានអាការៈធ្ងន់។
ករណីនេះបានកើតឡើងនៅថ្ងៃទី៣០ ខែមករា ឆ្នាំ២០២៣ នៅភូមិស្រែរាំង ឃុំទំនប់ធំ ស្រុកពញាឮ ខេត្តកណ្ដាល ។
មន្ត្រីនគរបាលស្រុកពញាឮបានឱ្យដឹងថា ស្ត្រីរងគ្រោះស្លាប់ឈ្មោះ លឹម ផល អាយុ៣៧ឆ្នាំ(ស្លាប់នៅក្នុងមន្ទីរពេទ្យក្នុងរាជធានីភ្នំពេញ) រីឯ៣នាក់មានអាការៈធ្ងន់នោះ ទី១.ឈ្មោះ លឹម ឡាង ភេទស្រី អាយុ៦១ឆ្នាំ ត្រូវជាម្តាយកំពុងសម្រាកព្យាបាលនៅមន្ទីរពេទ្យភ្នំពេញ(អាការៈធ្ងន់ធ្ងរ), ទី២.ឈ្មោះ រិន ឡយ ភេទប្រុស អាយុ០៧ឆ្នាំ ត្រូវជាកូនកំពុងសម្រាកព្យាបាលនៅមន្ទីរពេទ្យភ្នំពេញ(អាការៈធ្ងន់ធ្ងរ) និងទី៣.ឈ្មោះ រិន ស្រីលីន អាយុ១១ឆ្នាំ ត្រូវជាកូនកំពុងសម្រាកព្យាបាលនៅផ្ទះ (អាការៈស្រាល)។
ប្រភពដដែលបន្តថា កាលពីថ្ងៃទី២០ ខែមករា ឆ្នាំ២០២៣ ឈ្មោះ លឹម ផល បានទៅជីកដំឡូងជ្រូកនៅឯវាលស្រែយកមកស្ងោរហូប។ ក្រោយពីហូបរួចក៏មានអាការៈមិនស្រួលខ្លួន ហេីយក៏នាំគ្នាមកព្យាបាលនៅមន្ទីរពេទ្យក្នុងឃុំភ្នំបាត តែដោយសារអាការៈមិនបានធូរស្រាលទេីបនាំគ្នាទៅព្យាបាលបន្តនៅមន្ទីរពេទ្យភ្នំពេញ។ លុះមកថ្ងៃទី៣០ ខែមករា ឆ្នាំ២០២៣ វេលាម៉ោងប្រហែល១០ព្រឹកឈ្មោះ លឹម ផល បានស្លាប់នៅក្នុងមន្ទីរពេទ្យរាជធានីភ្នំពេញ។ ចំណែកសមាជិក០៣នាក់ទៀតកំពុងសម្រាកព្យាបាលនៅផ្ទះនិងនៅមន្ទីរពេទ្យភ្នំពេញបន្ត។
បច្ចុប្បន្នសពត្រូវបានក្រុមគ្រួសារយកមកធ្វើបុណ្យតាមប្រពៃណីនៅគេហដ្ឋានស្ថិតក្នុងភូមិស្រែរាំង ឃុំទំនប់ធំ ស្រុកពញាឮ ខេត្តកណ្តាល៕
ដោយ៖ស្អាង ជ័យ
