សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់ដួលបោកក្បាលស្លាប់ភ្លាមៗនៅនឹងកន្លែង ខណៈកំពុងជិះម៉ូតូតាមដងផ្លូវ ត្រូវរថយន្តស៊េរីទំនេីបម៉ាក FORD RANGER បេីកបញ្ច្រាសផ្លូវមកបុកពីមុខពេញទំហឹង កាលពីវេលាម៉ោង ១៥និង៣០នាទីរសៀល ថ្ងៃពុធ ទី១២ ខែមេសា ឆ្នាំ២០២៣ នៅត្រង់ចំណុចលើផ្លូវ៦០ម៉ែត្រក្រវ៉ាត់ក្រុងទី៣ ស្ថិតនៅភូមិ កណ្ដាល សង្កាត់ រលួស ខណ្ឌ ដង្កោ រាជធានីភ្នំពេញ ។
សមត្ថកិច្ចបានឱ្យដឹងថា ទី១ ភាគីម៉ូតូម៉ាកHONDA C125 ពណ៌ខ្មៅ ពាក់ផ្លាកលេខ កណ្ដាល 1S-6245 បើកបរដោយឈ្មោះ ស៊ុក សុលៀង ភេទប្រុស អាយុ២៩ឆ្នាំ មុខរបរកម្មកររោងចក្រ មានទីលំនៅស្ថិតនៅក្នុងភូមិ ក្រពើទ្រោម សង្កាត់ រលួស ខណ្ឌ ដង្កោ រាជធានីភ្នំពេញ (ស្លាប់នៅកន្លែងកើតហេតុ) ។ និងទី២ភាគីរថយន្តម៉ាក FORD RANGER ពណ៌ស ពាក់ផ្លាកលេខ ភ្នំពេញ 2BR-3190 (អ្នកបើកបរពុំស្គាល់អត្តសញ្ញាណ បានរត់គេចខ្លួនបាត់ពីកន្លែងកើតហេតុ បន្សល់ទុកតែរថយន្ត)។
តាមប្រភពព័ត៌មានពីកន្លែងកេីតហេតុបានឱ្យដឹងថា មុនកេីតហេតុ គេឃេីញបុរសម្នាក់ជិះម៉ូតូមួយគ្រឿងម៉ាក HONDA C125 ធ្វេីដំណេីរតាមបណ្ដោយផ្លូវ៦០ម៉ែត្រក្រវ៉ាត់ក្រុងទី៣ ទិសដៅពីកេីតមកលិចក្នុងល្បឿនល្មម ខណៈមកដល់ចំណុចកេីតហេតុ ស្រាប់តែមានរថយន្តម៉ាក FORD RANGER ធ្វេីដំណេីរបញ្ច្រាសទិសក្នុងល្បឿនលឿន និងមិនប្រយ័ត្នបានបុកភាគីខាងម៉ូតូពេញទំហឹង បណ្ដាលឱ្យរថយន្តនិងម៉ូតូខូចខាតផ្នែកខាងមុខយ៉ាងដំណំ ។ ចំណែកបុរសម្នាក់ភាគីខាងម៉ូតូបានដួលបោកក្បាលនិងថ្នល់ស្លាប់ភ្លាមៗនៅនឹងកន្លែង ។
ជុំវិញករណីគ្រោះថ្នាក់ចរាចរណ៍ខាងលើ សមត្ថកិច្ចមូលដ្ឋានខណ្ឌដង្កោ បានប្រគល់ឱ្យទៅការិយាល័យចរាចរណ៍ជើងគោករាជធានីភ្នំពេញ ធ្វេីការវាស់វែងយករថយន្តនិងម៉ូតូទៅរក្សាទុក រង់ចាំដោះស្រាយតាមច្បាប់ ។ ដោយឡែកសពជនរងគ្រោះ ត្រូវបានប្រគល់ទៅឱ្យក្រុមគ្រួសារយកទៅធ្វើបុណ្យតាមប្រពៃណី ៕
ដោយ ៖ ភារ៉ា ដង្កោ
