សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បន្ទាប់ពីបញ្ចប់ការរាប់ថយក្រោយ ១០០ថ្ងៃនៃដំណើរឆ្ពោះទៅធ្វើម្ចាស់ផ្ទះ នៃការប្រកួតកីឡាស៊ីហ្គេម លើកទី៣២រួចមក, នៅថ្ងៃទី៥ ខែឧសភា ឆ្នាំ២០២៣នេះ កម្ពុជានឹងត្រូវប្រារព្ធពិធីបើកការប្រកួតជាផ្លូវការ នៃព្រឹត្តិការណ៍កីឡាជាប្រវត្តិសាស្ត្រ នៅល្ងាចនេះ ,សូមអបអរសាទរ ពិធីបើកព្រឹត្តិការណ៍ កីឡាអាស៊ីអាគ្នេយ៍លើកទី៣២ (ថ្ងៃទី០៥ ខែឧសភា ឆ្នាំ២០២៣)។
សូមបញ្ជាក់ថា, ពិធីបើកព្រឹត្តិការណ៍កីឡាស៉ីហ្គេម នឹងត្រូវរៀបចំឡើងនៅពហុកីឡដ្ឋានជាតិមរតកតេជោ ក្រោមអធិបតីភាពដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងថ្នាក់ដឹកនាំនៃបណ្តាប្រទេសមួយចំនួនទៀត។
ការធ្វើជាម្ចាស់ផ្ទះនៃព្រឹត្តិការណ៍កីឡាស៉ីហ្គេម និងអាស៊ានប៉ារ៉ាហ្គេម គឺជាមោទនភាព និងមុខមាត់សម្រាប់ប្រទេស និងប្រជាជនកម្ពុជាទាំងមូល ដែលបានរង់ចាំអស់រយៈពេល ៦៤ឆ្នាំមកហើយ។
SEA Games: ចាប់ផ្តើមពីថ្ងៃទី០៥-១៧ ខែឧសភា ឆ្នាំ២០២៣ និង ASEAN Para Games: ចាប់ផ្តើមពីថ្ងៃទី០៣-០៩ ខែមិថុនា ឆ្នាំ២០២៣។
ការប្រកួតកីឡាស៊ីហ្គេម មានសរុបចំនួន ៣៧ប្រភេទកីឡា ត្រូវនឹងវិញ្ញាសារហូតដល់ ៥៨៦វិញ្ញាសា ដែលធ្វើឡើងនៅក្នុងរាជធានីភ្នំពេញ និងខេត្តចំនួន៤ រួមមាន៖ ព្រះសីហនុ, កែប, កំពត និងសៀមរាប។
ការទន្ទឹងរង់ចាំដ៏យូអង្វែងត្រូវបានបញ្ចប់ ជាមួយទំព័រប្រវត្តិសាស្ត្រថ្មីនឹងចាប់ផ្តើមនៅថ្ងៃនេះ ប្រជាពលរដ្ឋនៅទូទាំងប្រទេស ក្រៅប្រទេស ពិភពលោក ទាំងមូល ក៏ទន្ទឹងតាមដាន ព្រឹត្តិការណ៍ប្រវត្តិសាស្ត្រ ដែលពុំធ្លាប់មានតាំងពីឆ្នាំ ១៩៥៩ ដល់ឆ្នាំ២០២៣ ទើបកម្ពុជា មានថ្ងៃនេះ គឺ ៦៤ឆ្នាំក្រោយមក ។ ភាពអស្ចារ្យនេះ មានន័យថា កម្ពុជា មានសន្តិភាព ការអភិវឌ្ឍន៍ ទើបធ្វើអោយ កីឡារស់ក្នុង សន្តិភាព ៕
ដោយ ៖ សិលា
