សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យម្នាក់ជិះម៉ូតូធ្វេីសកម្មភាពឆក់ទូរស័ព្ទដៃពីនារីម្នាក់បានសម្រេចហេីយព្យាយាមគេចខ្លួនតែត្រូវបានសមត្ថកិច្ចដេញចាប់បានមកវិញ បង្កការភ្ញាក់ផ្អេីលកាលពីវេលាម៉ោង៨និង៣០ព្រឹក ថ្ងៃទី១៨ ខែឧសភា ឆ្នាំ២០២៣ ផ្លូវបេតុង សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។
ជនសង្ស័យឈ្មោះ កាំង តិចហាក់ ភេទប្រុសអាយុ២៦ឆ្នាំ មុខរបរមិនពិតប្រាកដ មានស្រុកកំណេីតនៅភូមិខ្នា ឃុំសុភី ស្រុកបាទី ខេត្តតាកែវ។
ចំណែកជនរងគ្រោះឈ្មោះ វី ស៊េនឌី ភេទស្រីអាយុ២៣ឆ្នាំ មុខរបរជាងអ៊ុតសក់ ស្នាក់នៅភូមិកំរៀង សង្កាត់ដង្កោ ខណ្ឌដង្កោ។ ទូរស័ព្ទដែលជនសង្ស័យឆក់ម៉ាក iPhone 7plus។
តាមប្រភពព័ត៌មានបានឱ្យដឹងថា មុនពេលកេីតហេតុជនរងគ្រោះជិះម៉ូតូតាមដងផ្លូវដោយទុកទូរស័ព្ទនៅឃ្លប់ម៉ូតូខាងមុខបន្ទាប់មកស្រាប់តែមានជនសង្ស័យជិះម៉ូតូម៉ាកហុងដាឌ្រីមសង់ ពណ៌ខ្មៅ ពាក់ស្លាកលេខតាកែវ1AC 8168 មកពីក្រោយធ្វេីសកម្មភាពឆក់យកទូរស័ព្ទជនរងគ្រោះហេីយព្យាយាមគេចខ្លួន។
ប្រភពដដែលបានបន្តថា ភ្លាមនោះជនរងគ្រោះក៏ជិះដេញពីក្រោយស្រែកថាចោរៗបង្កការភ្ញាក់ផ្អេីលដល់ពលរដ្ឋអ្នកធ្វេីដំណេីរនិងសមត្ថកិច្ចកំពុងល្បាតក៏ដេញរហូតទៅដល់ផ្ទះជួលដំបូលខៀវ ភូមិទួលពង្រ សង្កាត់ចោមចៅទី១ ជនសង្ស័យភ័យពេកជិះម៉ូតូបុករ៉ឺម៉កបណ្តាលឱ្យដួលត្រូវបានសមត្ថកិច្ចឃាត់បានតែម្តង។
ក្រោយឃាត់ខ្លួនជនសង្ស័យត្រូវបានសមត្ថកិច្ចនាំយកទៅប៉ុស្តិ៍នគរបាលចោមចៅទី១ដេីម្បីសួរនាំបន្ត ។
ចំណែកទូរស័ព្ទជនរងគ្រោះត្រូវបានសមត្ថកិច្ចប្រគល់ជូនវិញ៕
ដោយ៖ សុខាសែនជ័យ
