សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ យ៉ាងហោចណាស់ក៏មានបុរសម្នាក់បានស្លាប់និងម្នាក់ទៀតរងរបួសដោយសារករណីគ្រោះថ្នាក់ចរាចរណ៍គួរអោយរន្ធត់រវាងរថយន្តកុងតឺន័របុកជាមួយម៉ូតូ ផ្អើលដល់អ្នកភូមិទាំងយប់។
ហេតុការណ៍នេះបានកើតឡើងកាលពីវេលាម៉ោង៨និង២០នាទីយប់ ថ្ងៃទី០១ ខែមិថុនា ឆ្នាំ២០២៣ នៅលេីកផ្លូវជាតិលេខ០១ ចន្លោះគីឡូម៉ែត្រលេខ១៣៦និង១៣៧ ស្ថិតនៅភូមិប្រសូត្រ១ ឃុំកណ្ដៀងរាយ ស្រុកស្វាយទាប ខេត្តស្វាយរៀង។
យោងតាមសមត្ថកិច្ចនគរបាលស្រុកបានអោយដឹងថា បុរសដែលស្លាប់មានឈ្មោះ ពៅ ចាន់រ៉ា ភេទប្រុស អាយុ៣៨ឆ្នាំ មុខរបរកម្មកររោងចក្រ រស់នៅភូមិព្រៃធ្មង់ ឃុំរមាំងថ្កោល ស្រុកស្វាយទាប ខេត្តស្វាយរៀង។
ចំណែកអ្នករងរបួសមានឈ្មោះ សាន សុីថុន អាយុ៣៧ឆ្នាំ មុខរបរកម្មកររោងចក្រ រស់នៅភូមិព្រៃធ្មង់ ឃុំរមាំងថ្កោល ស្រុកស្វាយទាប ខេត្តស្វាយរៀង បើកម៉ូតូម៉ាកPCX ពណ៌ស ពាក់ស្លាកលេខភ្នំពេញ១J -១៦៦៦ខូចខាតយ៉ាងដំណំ។
រីឯអ្នកបើករថយន្តមិនត្រូវបានស្គាល់អតសញ្ញាណនោះទេ ក្រោយកើតហេតុ បានរត់គេចខ្លួនបាត់ភ្លាមៗបន្សល់តែរថយន្តកុងតឺន័រតែប៉ុណ្ណោះ។
តាមសមត្ថកិច្ចបានបញ្ជាក់ទៀតថា មុនកើតហេតុមានបុរស២នាក់បានជិះម៉ូតូមួយគ្រឿងម៉ាក PCX ពណ៌ស ពាក់ស្លាកលេខភ្នំពេញ១J-១៦៦៦ដោយធ្វើដំណើរពីកេីតទៅលិច ហើយប្រេីប្រាស់ល្បឿនលឿនខ្វះការប្រុងប្រយ័ត្នបណ្ដាលអោយដួល ស្រាប់តែមានរថយន្តកុងតឺន័រដែលបើកស្របទិសគ្នាមកពីក្រោយកិនពេញទំហឹងអ្នករួមដំណើរអង្គុយពីក្រោយស្លាប់តែម្ដង។
ក្រោយមកអ្នកស្លាប់ត្រូវបានសមត្ថកិច្ចធ្វើកំណត់ហេតុនិងបានប្រគល់សពអោយទៅក្រុមគ្រួសារធ្វើបុណ្យតាមប្រពៃណី ចំណែកអ្នករងរបួសបានបញ្ជួនទៅសម្រាកព្យាបាលនៅមន្ទីរពេទ្យបង្អែកស្រុកស្វាយទាប។
រីឯមធ្យោបាយធ្វើដំណើរសមត្ថកិច្ចអូសយកមករក្សាទុកនៅអធិការដ្ឋាននគរបាលស្រុកស្វាយទាបដើម្បីដោះស្រាយពេលក្រោយតាមច្បាប់៕
ដោយ ៖ សុថាន
