សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ ដោយសារតែខ្វះការប្រុងប្រយ័ត្នចំពោះចរន្តអគ្គិសនី បុរសម្នាក់បានស្លាប់ ពេលតខ្សែភ្លើងបូមទឹក មិនបានដកឌុយចេញពីព្រីភ្លើង។ នេះបេីយោងតាមរបាយការណ៍របស់អគ្គស្នងការដ្ឋាននគរបាលជាតិ បានឱ្យដឹងនៅថ្ងៃអាទិត្យទី០៤ ខែមិថុនា ឆ្នាំ២០២៣។
របាយការណ៍ដដែលបន្តថា ករណីឆក់ចរន្តអគ្គិសនីបណ្ដាលឱ្យមនុស្សស្លាប់ខាងលើនេះ បានកេីតឡេីងថ្ងៃទី០៣ ខែមិថុនា ឆ្នាំ២០២៣ម្សិលមិញនេះ នៅចំណុចក្រុមទី១៤ ភូមិអូរកំបុត ឃុំព្រែកខ្ពប ស្រុកឯកភ្នំ ខេត្តបាត់ដំបង។
បេីតាមការបញ្ជាក់ពីលោកវរសេនីយ៍ឯក ឡុង យោធាវីរៈ អធិការនគរបាលស្រុកឯកភ្នំ បានឱ្យដឹងថា ក្រោយកេីតហេតុភ្លាមៗ លោកបានចាត់ឱ្យកម្លាំងជំនាញចុះទៅដល់កន្លែងកើតហេតុ ពិនិត្យលេីជនរងគ្រោះឈ្មោះ ពេជ្រ ចំរើន ភេទប្រុស អាយុ ៣៥ឆ្នាំ រស់នៅភូមិអូរកំបុត ឃុំព្រែកខ្ពប ស្រុកឯកភ្នំ ខេត្តបាត់ដំបង។
លោកអធិការស្រុក បានឱ្យដឹងទៀតថា ជនរងគ្រោះបានតខ្សែភ្លើងបូមទឹកមិនបានដកឌុយចេញពីព្រីភ្លើង ទើបបណ្តាលអោយឆ្លងចរន្តឆក់ស្លាប់នៅនឹងកន្លែងកើតហេតុតែម្តង។
ក្រោយពីពិនិត្យទីកន្លែងហេតុ និងសាកសព ព្រមទាំងសាកសួរបំភ្លឺសាក្សីជុំវិញកន្លែងកើតហេតុ សមត្ថកិច្ចបានធ្វើការសន្និដ្ឋានបានថាសពឈ្មោះ ពេជ្រ ចំរើន នេះពិតជាស្លាប់ដោយសារឆ្លងចរន្តអគ្គីសនីពិតប្រាកដមែន។
បច្ចុប្បន្ន សាកសពជនរងគ្រោះត្រូវបានប្រគល់ជូនទៅឲ្យក្រុមគ្រួសារដើម្បីយកទៅធ្វើបុណ្យតាមប្រពៃណី៕
ដោយ៖សហការី
