សារព័ត៌មាន នគរវត្ត តែងតែនាំមុខគេជានិច្ច
ក្លិបអធិរាជស Real Madrid បានចុះហត្ថលេខាលើកីឡាករសញ្ជាតិអេស្ប៉ាញ Joselu ក្នុងលក្ខខណ្ឌខ្ចីជើងរយៈពេលមួយរដូវកាលពីក្លិបEspanyol ជាមួយនឹងជម្រើសក្នុងការទិញនៅចុងបញ្ចប់នៃរដូវកាលនេះ។
Joselu មានវ័យ៣៣ឆ្នាំគឺជាអ្នកស៊ុតបញ្ចូលទីច្រើនជាងគេលំដាប់ទី៣របស់ La Liga កាលពីរដូវកាលមុនដោយស៊ុតបាន១៦គ្រាប់ បើទោះបីជាក្រុមរបស់គាត់ត្រូវបានកាត់ចោលក៏ដោយ។ អតីតខ្សែប្រយុទ្ធ Stoke City និង Newcastle United រូបនេះក៏បានស៊ុតបញ្ចូលទីក្នុងយុទ្ធនាការឈ្នះពាន Nations League របស់អេស្ប៉ាញផងដែរ។
ការចុះហត្ថលេខារបស់គាត់បន្ទាប់ពីការចាកចេញរបស់ខ្សែប្រយុទ្ធ Karim Benzema ដែលបានចូលរួមជាមួយក្លឹបអារ៉ាប៊ីសាអ៊ូឌីត Al-Ittihad។Real Madrid កំពុងតែសម្លឹងមើលការបំពេញចន្លោះដែលបន្សល់ទុកដោយខ្សែប្រយុទ្ធបារាំងដែលឈ្នះ Ballon d’Or ដែលជាអ្នកស៊ុតបញ្ចូលទីច្រើនជាងគេបំផុតទី២របស់ក្លិបគ្រប់ពេល។
ប្រធានក្រុម Tottenham និងជាជម្រើសជាតិអង់គ្លេស Harry Kane ត្រូវបានផ្សារភ្ជាប់ជាមួយនឹងការផ្លាស់ទៅ Real Madrid ក្នុងនាមជាអ្នកជំនួសដែលពេញចិត្តសម្រាប់ Benzema ។
Joselu ត្រឡប់មករដ្ឋធានីអេស្ប៉ាញវិញ ដោយធ្លាប់បានចូលរួមជាមួយសាលាយុវជនរបស់ Real Madrid ក្នុងឆ្នាំ២០១០។ គាត់បានបង្ហាញខ្លួនជាលើកដំបូងសម្រាប់ក្រុមដំបូងក្នុងឆ្នាំ២០១១ ដោយស៊ុតបញ្ចូលទីបាន៣នាទីបន្ទាប់ពីចូលលេងជាកីឡាករបម្រុងទល់នឹង Almería។
ចាប់តាំងពីចាកចេញពី Real Madrid ក្នុងឆ្នាំ២០១២ ខ្សែប្រយុទ្ធសញ្ជាតិអេស្ប៉ាញរូបនេះបានលេងទាំងនៅ Bundesliga និង Premier League ។គាត់បានស៊ុតបាល់បញ្ចូលទី១០គ្រាប់នៅក្នុងក្របខ័ណ្ឌកំពូលរបស់អង់គ្លេសឆ្លងកាត់ការប្រកួតជាមួយ Stoke City និង Newcastle United មុនពេលត្រឡប់ទៅអេស្ប៉ាញក្នុងឆ្នាំ២០១៩ ជាមួយ Alaves ។
Joselu បានចូលរួមជាមួយ Espanyol មុនពេលរដូវកាល២០២២–២០២៣ហើយបានបញ្ចប់យុទ្ធនាការនៅពីក្រោយតែ Robert Lewandowski និង Benzema ក្នុងតារាងពិន្ទុ La Liga មុនពេលបង្ហាញខ្លួនជាអន្តរជាតិដំបូងរបស់គាត់ក្នុងខែមីនា ៕
ដោយ៖ ភារៈ(រូបភាព ៖ BBC Sport)
