សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ នារសៀលថ្ងៃទី២៣ ខែមិថុនា ឆ្នាំ២០២៣ ក្រសួងការ បរទេស និងសហប្រតិបត្តិការអន្តរជាតិកម្ពុជា បានបញ្ជាក់អោយដឹងថា, នៅព្រឹកថ្ងៃទី២១ ខែមិថុនា ឆ្នាំ២០២៣ នៅទីស្តីការក្រសួង លោក ជុំ សុន្ទរី រដ្ឋលេខាធិការនៃក្រសួងការបរទេស និងសហប្រតិបត្តិការអន្តរជាតិ បានទទួលការចូលជួបជំរាបលារបស់លោកស្រីបណ្ឌិត សារ៉ា ថេយ៍ឡ័រ ដែលបានបញ្ចប់បេសកកម្មការទូត ក្នុងឋានៈជាឯកអគ្គរដ្ឋទូតកាណាដាប្រចាំកម្ពុជាដែលមាននិវេសនដ្ឋាននៅទីក្រុងបាងកក។
នៅក្នុងជំនួបនោះ ភាគីទាំងពីរបានសម្តែងការពេញចិត្តចំពោះកិច្ចសហប្រតិបត្តិការទ្វេភាគីបច្ចុប្បន្ន រួមទាំងកំណើនជាបន្តបន្ទាប់នៃការផ្លាស់ប្តូរពាណិជ្ជកម្មរវាងប្រទេសទាំងពីរ ការកើនឡើងជាលំដាប់នៃភ្ញៀវទេសចរកាណាដាដែលមកទស្សនាកម្ពុជា និងទំនាក់ទំនងកម្រិតខ្ពស់ជាវិជ្ជមានរវាងនាយករដ្ឋមន្ត្រី និង រដ្ឋមន្ត្រីការបរទេសនៃប្រទេសទាំងពីរ។ ប្រការនេះបានបង្ហាញពីទំនាក់ទំនងដ៏រឹងមាំ និងយូរអង្វែងរវាងកម្ពុជា និងកាណាដា ដែលស្តែងពីការប្តេជ្ញាចិត្តរបស់រដ្ឋាភិបាលទាំងពីរក្នុងការពង្រឹងទំនាក់ទំនងនេះបន្ថែមទៀត។ ភាគីទាំងពីរក៏បានបញ្ជាក់ពីបំណងក្នុងការបង្កើតកិច្ចពិគ្រោះយោបល់ទ្វេភាគី ដើម្បីជាវេទិការស្វែងរកឱកាសបង្កើនកិច្ចសហប្រតិបត្តិការលើវិស័យផ្សេងៗ។
លោក រដ្ឋលេខាធិការ ជុំ សុន្ទរី បានឆ្លៀតឱកាសនោះសរសើរឯកអគ្គរដ្ឋទូត Taylor ចំពោះកិច្ចខិតខំប្រឹងប្រែងក្នុងការពង្រឹងទំនាក់ទំនងទ្វេភាគីក្នុងអាណត្តិរបស់លោកជំទាវ។ លោកក៏បានថ្លែងអំណរគុណដល់រដ្ឋាភិបាលកាណាដាចំពោះការរួមចំណែកក្នុងការអភិវឌ្ឍន៍សេដ្ឋកិច្ចសង្គមរបស់កម្ពុជា និងចំពោះការសន្យាផ្តល់ជំនួយបន្ថែមដើម្បីគាំទ្រសកម្មភាពបោសសម្អាតមីន ដែលនឹងរួមចំណែកដល់គោលដៅរបស់កម្ពុជាដើម្បីក្លាយជាប្រទេសគ្មានមីននៅឆ្នាំ២០២៥។
ភាគីទាំងពីរក៏បានពិភាក្សាអំពីកិច្ចសហប្រតិបត្តិការក្នុងវេទិកាពហុភាគី និងបានផ្លាស់ប្តូរយោបល់លើការពង្រឹងទំនាក់ទំនងអាស៊ាន-កាណាដា។ លោក រដ្ឋលេខាធិការបានរំលឹកឡើងវិញនូវការគាំទ្ររបស់កម្ពុជាក្នុងការលើកកម្ពស់ទំនាក់ទំនងកិច្ចសន្ទនាអាស៊ាន-កាណាដា ទៅជាភាពជាដៃគូយុទ្ធសាស្ត្រ។ ភាគីទាំងពីរក៏បានកត់សម្គាល់ពីសារៈសំខាន់នៃកិច្ចចរចាដែលកំពុងបន្ត ដើម្បីបង្កើតកិច្ចព្រមព្រៀងពាណិជ្ជកម្មសេរី អាស៊ាន-កាណាដា ដោយទទួលស្គាល់ពីអត្ថប្រយោជន៍ដែលអាចនឹងកើតមាននៅក្នុងកិច្ចសហប្រតិបត្តិការពាណិជ្ជកម្មទ្វេភាគី និងសេដ្ឋកិច្ច រវាងតំបន់ទាំងមូល និងកាណាដា ៕
ដោយ ៖ សិលា
