នាយករដ្ឋមន្ត្រីកម្ពុជា បញ្ជាឱ្យអគ្គស្នងការទប់ស្កាត់ ព័ត៌មានក្លែងក្លាយទាក់ទងរឿងយន្តហោះគ្មាន មនុស្សបើក

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា  បានបញ្ជាឱ្យទប់ស្កាត់នូវព័ត៌មានក្លែងក្លាយដែលថាមានយន្តហោះគ្មានមនុស្សបើកហោះចូលទឹកដីកម្ពុជាដែលបំភ័យដល់ប្រជាពលរដ្ឋ ខណៈគិតត្រឹមម៉ោង១០យប់ថ្ងៃទី២៨ ខែមិថុនា ឆ្នាំ២០២៣នេះ ពុំទាន់មានយន្តហោះគ្មានមនុស្សបើកហោះចូលទឹកដីកម្ពុជាឡើយ។

សម្តេចតេជោ ហ៊ុន សែន បានអះអាងថា យន្តហោះដែលហោះមកទឹកដីកម្ពុជានោះ គឺគ្រាន់តែជាយន្តហោះពាណិជ្ជកម្មដែលហោះឆ្លងដែនឱកាសកម្ពុជាតែប៉ុណ្ណោះ។

សម្តេចតេជោ ហ៊ុន សែន ថ្លែងដូច្នេះថា៖«យន្តហោះគ្មានមនុស្សបើក គឺខុសប្លែកពីយន្តហោះពាណិជ្ជកម្មដែលនឹងត្រូវហោះឆ្លងដែនអាកាសរបស់យើងឆ្ពោះទៅកាន់ទីកន្លែងដទៃទៀត ប្រសិនជាមានការបាញ់យន្តហោះនោះគឺវាគ្រោះថ្នាក់ធំធេងណាស់»។

សម្តេចតេជោ ហ៊ុន សែន បានបញ្ជាឱ្យបញ្ឈប់ការផ្សព្វផ្សាយព័ត៌មានក្លែងក្លាយនេះ ជាមួយគ្នានេះសម្តេចប្រាប់ឱ្យអគ្គស្នងការជាតិត្រួតពិនិត្យលើហ្វេសប៊ុកដែលបានផ្សព្វផ្សាយព័ត៌មានក្លែងក្លាយបែបនេះ។ ដោយឡែកនៅថ្ងៃទី២៩ ខែមិថុនា ឆ្នាំ២០២៣ ក្នុងជំនួបជាមួយនឹងកម្មករជិត ២ម៉ឺននាក់នៅក្នុង ស្រុកអង្គស្នួល ខេត្តកណ្ដាល សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានផ្តាំទៅអ្នកលេងបណ្តាញសង្គមFacebookទាំងអស់ មិនត្រូវយកបញ្ហាសន្តិសុខជាតិមកបង្ហោះលេងដោយគ្មានការអនុញ្ញាតពីក្រសួងការពារជាតិនោះទេ ខណៈបញ្ហានេះមិនមែនជារឿងយកមកលេងសើចនោះឡើយ។

ការលើកឡើងរបស់សម្តេចតេជោ ប្រមុខរាជរដ្ឋាភិបាលនេះ គឺបានធ្វើឡើងបន្ទាប់ពី មានអ្នកលេង​ហ្វេស​បុកមួយ​ចំនួនតូចបានយកករណីដ្រូន ឬយន្តហោះគ្មានមនុស្សបើកហោះចូលទឹកដីកម្ពុជា​ដែលជាប់ព្រំដែនវៀតណាម មកភ្ជាប់ជាមួយយន្តហោះពាណិជ្ជកម្ម​ដែលហោះកាត់កម្ពុជា​កាលពីកន្លងទៅថ្មីៗនេះ ៕

ដោយ ៖ សិលា