សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់និងនារី២នាក់ទៀតរួមដំណេីរជាមួយគ្នាបានបេីករថយន្តស៊េរីទំនើបម៉ាកGreat Wallមួយគ្រឿង មិនប្រយ័ត្នបានជ្រុលទៅបុករថយន្តម៉ាក Toyota Prius នៅផ្លូវបំបែកជាបួន បណ្ដាលឱ្យរងការខូចខាតយ៉ាងដំណំ ដែលបង្កឡេីងកាលពីវេលាម៉ោង៣និង៣០នាទីទៀបភ្លឺឈានចូលថ្ងៃទី១៣ ខែកក្កដា ឆ្នាំ២០២៣ ស្ថិតនៅតាមបណ្តោយផ្លូវលេខ៤៣២កែងផ្លូវលេខ១០៤ ក្នុងសង្កាត់បឹងត្របែក ខណ្ឌចំការមន។
យោងតាមប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញរថយន្តម៉ាក Toyota Prius ពណ៌ស មួយគ្រឿង ពាក់ផ្លាកលេខ ភ្នំពេញ 2AB-7371បើកបរដោយបុរសម្នាក់ធ្វើដំណើរតាមបណ្តោយផ្លូវលេខ៤៣២ ក្នុងទិសដៅពីលិចទៅកើតនិងឆ្លងកាត់ផ្លូវបំបែកជាបួន ខណៈបើកឆ្លងដល់ពាក់កណ្តាលផ្លូវ ស្រាប់តែមានរថយន្តស៊េរីទំនើបម៉ាក GreatWallមួយគ្រឿងពាក់ផ្លាកលេខ ខេមរភូមិន្ទ 01 2.8282បើកបរដោយបុរសម្នាក់រួមដំណើរជាមួយនារី២នាក់ទៀតធ្វើដំណើរចេញពីផ្លូវលេខ១០៥ ពីជើងមកត្បូងក្នុងល្បឿនលឿននិងមិនប្រយ័ត្នបានជ្រុលចង្កូតទៅបុកចំពីចំហៀងខាងឆ្វេងរថយន្ត Prius បណ្ដាលឱ្យខូចខាតថ្ពាល់និងទ្វារយ៉ាងដំណំ ចំណែករថយន្តបង្កវិញក៏ខូចខាតផ្នែកខាងមុខយ៉ាងធ្ងន់ធ្ងរផងដែរតែមិនបង្កគ្រោះថ្នាក់ដល់មនុស្សនោះឡេីយ ។
ក្រោយកើតហេតុ សមត្ថកិច្ចមូលដ្ឋានបានចុះទៅដល់ ដោយឱ្យភាគីទាំងសងខាងធ្វេីការសម្រួលគ្នាមួយជំហាន ។ ចុងក្រោយភាគីរថយន្តបង្កស៊េរីទំនើប GreatWall ព្រមសងថ្លៃខូចខាតទៅលើរថយន្ត Prius ចំនួន២០០ដុល្លារដេីម្បីបញ្ចប់រឿងនៅនឹងកន្លែងកេីតហេតុតែម្ដង ៕
ដោយ ៖ ភារ៉ា ដង្កោ
