សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ លោកវរសេនីយ៍ឯក ស គឹមឡុង អធិការនគរបាលស្រុកមោងឫស្សី នៅព្រឹកថ្ងៃទី១៨ ខែកក្កដា ឆ្នាំ២០២៣នេះ បានឱ្យដឹងថា មុខសញ្ញាចែកចាយគ្រឿងញៀនម្នាក់ នៅស្រុកមោងឫស្សី ត្រូវបានកម្លាំងនគរបាលជំនាញស្រុក ចុះស្រាវជ្រាវបង្ក្រាប និងឃាត់ខ្លួនរួមនិងវត្ថុតាងជាក់ស្ដែង យកមកសាកសួរដេីម្បីចាត់ការតាមច្បាប់។
លោកអធិការស្រុក បន្តថា កាលពីល្ងាចថ្ងៃទី១៧ខែ កក្កដា ឆ្នាំ២០២៣ម្សិលមិញនេះ លោកបានដឹកនាំកម្លាំងផ្នែកប្រឆាំងគ្រឿងញៀនរួមជាមួយកម្លាំងប៉ុស្តិ៍នគរបាលរដ្ឋបាលព្រៃស្វាយចុះប្រតិបត្តិការបង្ក្រាបករណីរក្សាទុកដោយខុសច្បាប់នូវសារធាតុញៀន ០១ករណី ក្នុងបទល្មើសជាក់ស្តែងដោយឃាត់ខ្លួនជនសង្ស័យម្នាក់ ស្ថិតនៅចំណុចក្រុមទី០៨ ភូមិផ្លូវបំបែក ឃុំព្រៃ ស្វាយ ស្រុកមោងឫស្សី ខេត្តបាត់ដំបង។
ជនសង្ស័យខាងលេីនេះឈ្មោះ ហ៊ត ហៀប ភេទប្រុស អាយុ២២ឆ្នាំ មានទីលំនៅភូមិផ្លូវបំបែក ឃុំព្រៃស្វាយ ស្រុកមោងឫស្សី ខេត្តបាត់ដំបង។
វត្ថុតាងចាប់យកបានរួមមាន៖
-ម្សៅក្រាមពណ៌សថ្លាច្រកក្នុងកូនថង់ប្លាស្ទិចពណ៌សថ្លាចំនួន ១០កូនថង់ ទម្ងន់ ២.៣៤ ក្រាម ទាំងសំបក សង្ស័យមានសារធាតុញៀន
-កាបូបដាក់ប្រាក់ចំនួន ០១
-ទូរស័ព្ទដៃចំនួន ០១គ្រឿង។
បច្ចុប្បន្នជនសង្ស័យត្រូវបានឃាត់ខ្លួនបណ្តោះអាសន្ននៅអធិការដ្ឋាននគរបាលស្រុកមោងឫស្សីដើម្បីកសាងសំណុំរឿងបញ្ជូនមកអនុវត្តតាមនីតិវិធីច្បាប់៕
ដោយ៖សហការី
