សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ នៅថ្ងៃអង្គារ១កើតខែទុតិយាសាឍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៨ ខែកក្កដា ឆ្នាំ២០២៣ វេលាម៉ោងប្រមាណ០១ និង៣០នាទី នៅចំណុចអូរត្រជាក់ចិត្ត ស្ថិតក្នុងភូមិភ្ជាវ ឃុំត្រែង ស្រុករតនមណ្ឌល ខេត្តបាត់ដំបង មានករណីប្រើអំពើហិង្សាក្នុងគ្រួសារ (បទឃាតកម្ម )មួយកើតឡើងបង្កដោយជនសង្ស័យឈ្មោះ ជា សុភាព ភេទប្រុស អាយុ៣១ឆ្នាំជាប្ដី រស់នៅភូមិភ្ជាវ ឃុំត្រែង ស្រុករតនមណ្ឌល ខេត្តបាត់ដំបង បានធ្វើសកម្មភាពយកដំបងឫស្សីវាយលើជនរងគ្រោះឈ្មោះ ឆូយ វន ភេទស្រី ជាប្រពន្ធ អាយុ៤៨ឆ្នាំ រស់នៅភូមិភ្ជាវ ឃុំត្រែង ស្រុករតនមណ្ឌល ខេត្តបាត់ដំបង ចំនួន៣០ដំបងរបួសពេញដងខ្លួន និងបែកសាច់ស្មងជើងទាំងសងខាង បណ្ដាលឱ្យស្លាប់ភ្លាមៗនៅកន្លែងកេីតហេតុតែម្ដង ។
នៅពេលកេីតហេតុភ្លាម អនុវត្តតាមបទបញ្ជារបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង លោកវរសេនីយ៍ឯក សន និល អធិការនគរបាលស្រុករតនមណ្ឌល បានដឹកនាំកម្លាំងផ្នែកជំនាញនិងកម្លាំងប៉ុស្តិ៍នគរបាលរដ្ឋបាលចុះទៅឃាត់ខ្លួនជនសង័្សយជាប្តីនេះយកមកកាន់អធិការដ្ឋាននគរបាលស្រុកដេីម្បីសាកសួរស្រាវជ្រាវ។
ចំពោះមូលហេតុដែលនាំឱ្យកេីតករណីហិង្សាគឺទាំងពីរនាក់ប្តីប្រពន្ធនេះ បុរសជាប្តីបានរៀបរាប់ថា គេទាំងពីរនាក់នេះរស់នៅលេីចំណីដីរបស់អ្នកដទៃ មិនមានមុខរបរឱ្យប្រាកដទេ ដេីរស៊ីឈ្នួលធ្វេីចម្ការឱ្យគេ ហេីយផឹកស្រាទាំងពីរនាក់រាល់ថ្ងៃនិងតែងបង្កជម្លោះជាមួយគ្នាគ្រប់ពេលស្រវឹងស្រាម្តងៗ។
នៅមុនពេលកេីតហេតុនេះគឺគេនិងប្រពន្ធបានផឹកស្រាអស់ពីរលីត្រហេីយបង្កជម្លោះជាមួយគ្នា រហូតរូបគេយកដំបងឫស្សី វាយលើប្រពន្ធបណ្តាលឱ្យបាត់បង់ជីវិតតែម្តង។
នៅពេលនេះនគរបាលស្រុករៀបចំកសាងសំណុំរឿងបញ្ជូនជនសង័្សយមកកាន់ការិយាល័យជំនាញអនុវត្តបន្តតាមនីតិវិធី ច្បាប់ រីឯសពបានប្រគល់ជូនក្រុមគ្រួសារដែលជាកូនរស់នៅឯស្រុកថ្មគោលចាត់ចែងធ្វេីបុណ្យតាមប្រពៃណី៕
ដោយ៖ សហការី
