សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ គ្រាប់យុទ្ធភណ្ឌមិនទាន់ផ្ទុះ ដែលកំពុងកប់នៅក្រោមបាតទន្លេ អាចមានប្រមាណជាង២ពាន់តោន ខណៈដែលការរុករកកំពុងជួបផលលំបាក ដោយសារគ្រាប់ទាំងនោះនៅកប់ជ្រៅពេក ។
នេះបើតាមការលើកឡើងរបស់លោកហេង រតនា អគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា ហៅកាត់ថា (CMAC) ។
លោកហេង រតនា អគ្គនាយក CMAC បានឱ្យដឹងថា បច្ចុប្បន្ននេះ ការរុករកបោសសម្អាតគ្រាប់ មីន និងយុទ្ធភណ្ឌមិនទាន់ផ្ទុះនៅក្នុងបាតទន្លេ ក្នុងភូមិសាស្ត្រឃុំកោះចេក ស្រុកពាមជរ ខេត្តព្រៃវែង កំពុង ត្រូវបានធ្វើឡើង ហើយកងកម្លាំងរបស់អង្គភាពស៊ីម៉ាក់ បានរកឃើញគ្រាប់ជាច្រើនប្រភេទ មានដូចជា គ្រាប់១០៥មីលីម៉ែត្រ, គ្រាប់កាំភ្លើងធំ គ្រាប់កាំភ្លើងត្បាល់ ជាដើម សរុបជិត២ម៉ឺនគ្រាប់ ដែលស្មើនឹងប្រមាណជាង៤០០តោន ។
លោកបានបញ្ជាក់ទៀតថា ប្រតិបត្តិការរុករកនេះ មានបញ្ហាលក្ខណៈបច្ចេកទេសខ្លះ និងការគាំទ្រខ្លះ នៅមិនទាន់ស៊ីគ្នា ហើយការងារមួយចំនួន ដូចជាការរកគ្រាប់នៅកប់ក្នុងល្បាប់ភក់ មិនទាន់ស្របតាមផែនការ តែយ៉ាងណាក៏មានមោទកភាព ដែលកងកម្លាំង បានរកឃើញគ្រាប់ច្រើន និងមិនមានគ្រោះថ្នាក់ ។
គួរបញ្ជាក់ថា យុទ្ធនាការបោសសម្អាតគ្រាប់មីន និងយុទ្ធភណ្ឌមិនទាន់ផ្ទុះក្នុងភូមិសាស្ត្រស្រុកពាមជរនេះ បានចាប់ផ្ដើមអនុវត្តកាលពីខែមិថុនា ឆ្នាំ២០២២ ដោយកម្លាំងស៊ីម៉ាក់ និងអង្គភាពពិសេស៩១១ ៕
ដោយ៖ ស សម
