សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យោងតាមទិន្នន័យគ្រោះថ្នាក់ចរាចរណ៍ផ្លូវគោកទូទាំងប្រទេស ចេញដោយនាយកដ្ឋាននគរបាលចរាចរណ៍ និងសណ្តាប់សាធារណៈ នៃអគ្គស្នងការដ្ឋាន នគរបាលជាតិ ករណីគ្រោះថ្នាក់ចរាចរណ៍នៅទូទាំងប្រទេសកម្ពុជា កាលពីថ្ងៃទី២៤ កញ្ញា ម្សិលមិញនេះ បានកើតឡើងចំនួន ១៣លើក ក្នុងនោះអ្នកស្លាប់ចំនួន ០៧នាក់ របួសចំនួន ១៣នាក់ (របួសធ្ងន់ចំនួន ០៧នាក់)។ ជាក់ស្ដែងរយៈពេល ២៤ថ្ងៃកន្លងទៅនេះ មានករណីគ្រោះថ្នាក់ចរាចរណ៍ចំនួន ២៤១លើក បណ្ដាលឱ្យមនុស្សស្លាប់ ១០៤នាក់ របួស ៣៩២នាក់ (របួសធ្ងន់ ១៩៦នាក់)។
រាយការណ៍ដដែលបន្តថា សម្រាប់ថ្ងៃដដែលនេះ មានយានយន្តសរុបចំនួន ១៧៦គ្រឿងទៀត ត្រូវបាននគរបាលទូទាំងប្រទេសត្រួតពិនិត្យ និងផាកពិន័យ ក្នុងនោះមានម៉ូតូ ១៦២គ្រឿង និងរថយន្ត ១៤គ្រឿង។
ជាក់ស្ដែងក្នុងប្រតិបត្តិការនោះ កម្លាំងនគរបាលចរាចរណ៍ទូទាំងប្រទេសបានត្រួតពិនិត្យ និងផាកពិន័យយានយន្តសរុបចំនួន ២,៦៤៣គ្រឿង ក្នុងនោះមានម៉ូតូ ២,២៦១គ្រឿង និងរថយន្តគ្រប់ប្រភេទ ៣៨២គ្រឿង។
ក្នុងបទល្មើសដែលត្រូវបានកត់សម្គាល់សម្រាប់ម៉ូតូរួមមាន៖ មួក ល្មើសសញ្ញា និងអត់ស្លាកលេខជាដើម។ ដោយឡែករថយន្តរួមមាន៖ ស្រវឹង អត់បណ្ណបើកបរ លើសចំណុះ ល្មើសល្បឿន ឆៀក និងល្មើសសញ្ញាជាដើម។
គួរជម្រាបជូនថា លោកឧត្តមសេនីយ៍ឯក ឆាយ គឹមខឿន តែងតែថ្លែងអំណរគុណ និងកោតសរសើរដល់ជនរួមជាតិជាអ្នកប្រើប្រាស់ផ្លូវទាំងអស់ ដែលបានចូលរួមគោរពច្បាប់ចរាចរណ៍យ៉ាងល្អប្រសើររយៈពេលកន្លងមកនេះ ជាពិសេសកោតសរសើរ និងអរគុណដល់នគរបាលចរាចរណ៍ដែលបានលះបង់ និងខិតខំប្រឹងប្រែងជំរុញការរឹតបន្តឹងចរាចរណ៍ប្រកបដោយស្មារតី ទទួលខុសត្រូវខ្ពស់បំផុត៕
ដោយ៖សហការី
