សារព័ត៌មាន នគរវត្ត តែងតែនាំមុខគេជានិច្ច
ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានចុះហត្ថលេខាលើក្រឹត្យមួយ ដោយអំពាវនាវឱ្យពលរដ្ឋចំនួន ១៣០,០០០នាក់ចុះឈ្មោះចូលបម្រើការងារ ប៉ុន្តែមិនត្រូវធ្វើសង្គ្រាមនៅអ៊ុយក្រែននោះទេ។
RIA Novosti បានរាយការណ៍ថា ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានចុះហត្ថលេខាលើក្រឹត្យមួយស្តីពីការជ្រើសរើសយោធាដូចធម្មតានៅរដូវស្លឹកឈើជ្រុះ ដោយអំពាវនាវឱ្យពលរដ្ឋចំនួន ១៣០ពាន់នាក់ក្នុងប្រទេសនេះចុះឈ្មោះ។ យោងតាមឯកសារដែលបានបង្ហោះនៅលើគេហទំព័ររបស់រដ្ឋាភិបាលរុស្ស៊ីដែលប្រកាសអំពីគោលនយោបាយច្បាប់កាលពីថ្ងៃទី 29 ខែកញ្ញា បុរសទាំងអស់ដែលមានអាយុចន្លោះពី18 ទៅ 27 ឆ្នាំនៅក្នុងប្រទេសរុស្ស៊ីត្រូវបំពេញកាតព្វកិច្ចយោធារយៈពេល 12 ខែ ឬចូលរួមក្នុងវគ្គបណ្តុះបណ្តាលយោធាដែលមានតម្លៃស្មើពេលកំពុងសិក្សានៅសាកលវិទ្យាល័យ។
ការអភិវឌ្ឍថ្មីនេះកើតឡើងក្នុងបរិបទដែលកងកម្លាំងប្រដាប់អាវុធរុស្ស៊ីកំពុងធ្វើយុទ្ធនាការយោធាពិសេសនៅអ៊ុយក្រែន ដែលឥឡូវឈានចូលដល់ខែទី២០ ហើយកាលពីខែមីនា លោកពូទីនក៏បានចុះហត្ថលេខាលើក្រឹត្យស្តីពីការបម្រើយោធាដោយអំពាវនាវឱ្យមានមនុស្ស១៤៧.០០០នាក់ចូលបម្រើកងទ័ព ។
ទោះជាយ៉ាងណាក៏ដោយ កាសែត The Moscow Times បានដកស្រង់សម្តីអគ្គនាយករងនៃអគ្គនាយកដ្ឋានរៀបចំនិងការចល័តអគ្គសេនាធិការនៃកងកម្លាំងប្រដាប់អាវុធរុស្ស៊ី – ឧត្តមនាវីទោ Vladimir Tsimlyansky នៅថ្ងៃទី 29 ខែកញ្ញាថា អ្នកដែលត្រូវបានជ្រើសរើសនៅក្នុងក្រុមថ្មីនេះនឹងមិនចូលរួមក្នុងយោធាពិសេសរបស់រុស្ស៊ីនៅអ៊ុយក្រែននោះទេ។
កាលពីខែមុន លោកពូទីនបានចុះហត្ថលេខាលើច្បាប់ដែលបង្កើនអាយុអតិបរមាដែលបុរសរុស្ស៊ីអាចចូលរួមក្នុងការបម្រើយោធាពី 27 ទៅ 30 ឆ្នាំ។ ច្បាប់ថ្មីនេះចូលជាធរមានចាប់ពីថ្ងៃទី 1 ខែមករា ឆ្នាំ 2024៕
ដោយ៖ ធីរីណា(រូបថត៖ RIA NOVOSTI)
