សារព័ត៌មាន នគរវត្ត តែងតែនាំមុខគេជានិច្ច
ក្រុមម្ចាស់ផ្ទះ Chicago Fire បានផ្តល់ការលើកទឹកចិត្តផ្នែកហិរញ្ញវត្ថុសម្រាប់អ្នកគាំទ្រដែលចូលរួមការប្រកួតលីកកំពូលអាមេរិក MLS កាលពីរាត្រីថ្ងៃពុធជាមួយក្រុម Inter Miami ដែលកីឡាករឆ្នើម Lionel Messi អវត្តមានដោយសាររបួស។ ការប្រកួតនេះក្រុមម្ចាស់ផ្ទះបានយកឈ្នះក្នុងលទ្ធផល ៤ទល់១។
ក្រុម Chicago Fire បានលក់សំបុត្រជាង៦១,០០០សម្រាប់ការប្រកួតនៅកីឡដ្ឋាន Soldier Field ។ម្ចាស់ពាន Ballon d’Or ៧សម័យ Messi បានខកខានការប្រកួត៣លើកចុងក្រោយរបស់ក្រុម Inter Miami។
ក្រុម Chicago Fire នឹងផ្តល់ឥណទាន២៥០ដុល្លារដល់សមាជិកភាពថ្មីសម្រាប់រដូវកាល២០២៤ ឬឥណទាន៥០ដុល្លារដល់អ្នកទិញសំបុត្រសម្រាប់ការប្រកួតតែមួយ។ ពួកគេបាននិយាយថា អ្នកគាំទ្រនឹងទទួលបានក្រេឌីតមិនថាកីឡាករណាអាចបង្ហាញខ្លួននៅលើទីលានបាន។
សេចក្តីថ្លែងការណ៍របស់ក្លិប Chicago Fire បានឲ្យដឹងថា “ខណៈដែលយើងមិនទាន់ដឹងពីស្ថានភាពផ្លូវការនៃវត្តមានរបស់ Lionel Messi សម្រាប់ការប្រកួតរបស់យើងនៅថ្ងៃនេះនោះទេ ព្រោះថា មិនមានការធានាថាអត្តពលិកម្នាក់នឹងលេងនៅយប់ណាមួយនោះទេ ដោយសារកត្តាជាច្រើន យើងយល់ថាមនុស្សជាច្រើនរបស់យើង អ្នកគាំទ្រអាចនឹងខកចិត្តប្រសិនបើពួកគេមិនមានឱកាសឃើញគាត់លេង។ យើងដឹងថា នឹងមានអ្នកចូលរួមជាច្រើនដែលនឹងមកប្រកួត Chicago Fire នៅ Soldier Field ជាលើកដំបូង ហើយយើងរីករាយក្នុងការស្វាគមន៍ពួកគេមកកាន់ Chicago Fire Family និងផ្តល់ឱកាសឱ្យពួកគេក្លាយជាអ្នកគាំទ្ររយៈពេលវែងដោយ បង្កើតបរិយាកាសដ៏អស្ចារ្យ ផ្តោតលើអ្នកគាំទ្រ”។
អ្នកចូលរួមខ្ពស់បំផុតរបស់ក្រុម Chicago Fire នៅ Soldier Field មាន៣៧,១២២នាក់ទល់នឹងក្រុម LA Galaxy ក្នុងរដូវកាលដំបូងរបស់ពួកគេកាលពីឆ្នាំ១៩៩៨។
Messi ដែលជាអ្នកជើងឯក World Cup អាហ្សង់ទីនបានលេងម្តងក្នុង៦ប្រកួតសម្រាប់ក្រុម Inter Miami ចាប់តាំងពីថ្ងៃទី៣ ខែកញ្ញា ហើយបានមើលការបរាជ័យ ២–១ របស់ពួកគេដោយក្រុម Houston Dynamo ក្នុងវគ្គផ្តាច់ព្រ័ត្រនៃ US Open Cup កាលពីសប្តាហ៍មុនផងដែរ។ Messi វ័យ៣៦ ឆ្នាំបានចុះហត្ថលេខានៅ Inter Miami ក្នុងខែកក្កដា បន្ទាប់ពីកិច្ចសន្យារបស់គាត់ជាមួយក្រុម Paris St-Germain បានផុតកំណត់៕
ដោយ៖ ភារៈ(រូបភាព ៖ BBC Sport)
