ជនជាតិអាមេរិក ២៩ នាក់បានស្លាប់នៅក្នុងជម្លោះអុីស្រាអែល-ហាម៉ាស់

ចែករំលែក៖

អ្នកនាំពាក្យក្រសួងការបរទេសអាមេរិកបានបញ្ជាក់ថា ពលរដ្ឋអាមេរិក ២៩ នាក់ត្រូវបានសម្លាប់ក្នុងការវាយប្រហាររបស់ក្រុមហាម៉ាស់នៅអុីស្រាអែល។
ក្រសួងការបរទេសអាមេរិកបាននិយាយកាលពីថ្ងៃទី ១៤ ខែតុលាថា មិនត្រឹមតែពលរដ្ឋអាមេរិក ២៩ នាក់ប៉ុណ្ណោះដែលបានស្លាប់នៅក្នុងប្រទេសអុីស្រាអែលនោះទេ ប៉ុន្តែនៅមាន ១៥ នាក់ផ្សេងទៀតនៅតែបាត់ខ្លួន។
ក្រសួងការបរទេសសហរដ្ឋអាមេរិកបាននិយាយថា “រដ្ឋាភិបាលសហរដ្ឋអាមេរិកកំពុងធ្វើការ ដើម្បីកំណត់កន្លែងលាក់ខ្លួនរបស់ពួកគេ និងធ្វើការជាមួយរដ្ឋាភិបាលអុីស្រាអែលលើគ្រប់ទិដ្ឋភាពនៃវិបត្តិចំណាប់ខ្មាំង រួមទាំងការចែករំលែកការស៊ើបការណ៍សម្ងាត់ និងការបញ្ជូនអ្នកជំនាញអាមេរិកទៅប្រឹក្សាដល់អុីស្រាអែលអំពីកិច្ចខិតខំប្រឹងប្រែងជួយសង្គ្រោះចំណាប់ខ្មាំង” ។

មន្ទីរបញ្ចកោណក៏បានបញ្ជូនក្រុមវាយប្រហារនាវាផ្ទុកយន្តហោះទីពីរទៅកាន់សមុទ្រមេឌីទែរ៉ាណេភាគខាងកើត ក្បែរអុីស្រាអែល ដើម្បីការពារអុីរ៉ង់ ឬក្រុមហេសបូឡា ពីការចូលរួមក្នុងជម្លោះអុីស្រាអែល-ហាម៉ាស់។ ដូច្នោះហើយ ក្រុមវាយប្រហារនាវាផ្ទុកយន្តហោះ USS Eisenhower នឹងចូលរួមជាមួយក្រុមវាយប្រហារនាវាផ្ទុកយន្តហោះ USS Gerald R Ford ដែលមានវត្តមាននៅក្នុងដែនទឹកអន្តរជាតិនៅឆ្នេរសមុទ្រអុីស្រាអែល។
មន្ត្រីជាន់ខ្ពស់អាមេរិកបានបញ្ជាក់ថា វត្តមានរបស់ក្រុមវាយប្រហារនាវាផ្ទុកយន្តហោះរបស់ប្រទេសនេះនៅភាគខាងកើតមេឌីទែរ៉ាណេ និងការបន្ថែមយន្តហោះចម្បាំងរបស់កងទ័ពអាកាសអាមេរិកទៅកាន់តំបន់នេះ បង្ហាញពីការប្តេជ្ញាចិត្តរបស់សហរដ្ឋអាមេរិកជាមួយអុីស្រាអែល ដោយពង្រឹងសមត្ថភាពរារាំង និងព្រមានអុីរ៉ង់ និងក្រុមហេសបូឡា មិនឱ្យចូលរួមក្នុង ជម្លោះអុីស្រាអែល-ហាម៉ាស់។
ការវាយឆ្មក់របស់ក្រុមហាម៉ាស់លើអុីស្រាអែលកាលពីថ្ងៃទី៧ តុលា បានបង្កឱ្យមានជម្លោះធំមួយក្នុងតំបន់ ។ មនុស្សជាង ១.៣០០ នាក់បានស្លាប់នៅក្នុងប្រទេសអុីស្រាអែល ហើយមនុស្សជាង ២.២០០ នាក់បានស្លាប់នៅតំបន់ហ្គាហ្សាស្ទ្រីប៕ ដោយ៖ ធីរីណា