សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ ៖ សមត្ថកិច្ចនគរបាលនៃស្នងការដ្ឋាននគរបាលខេត្តកំពង់ស្ពឺបានធ្វើការស្រាវជ្រាវរហូតឈានដល់ការឃាត់ខ្លួនក្រុមក្មេងទំនើងជាបន្តបន្ទាប់ក្រោយពីពួកក្មេងទាំងនេះនាំគ្នាធ្វើសកម្មភាពដេញវាយគ្នាកក្រើកក្នុងឱកាសបុណ្យភ្ជុំបិណ្ឌនៅ បូជនីយដ្ឋានភ្នំចាស់ ។
យោងទៅតាមការបញ្ជាក់ពីក្រុមការងារប្រតិកម្មរហ័ស ស្នងការដ្ឋាននគរបាលខេត្ដកំពង់ស្ពឺបានបញ្ជាក់ថា ក្រោយពីទទួលបានព័ត៌មានតាមបណ្ដាញសង្គម tik tok កាលពីថៃ្ងទី ១២ តុលា ២០២៣ នៅចំណុចវត្តសុច័ន្ទគីរី(ហៅវត្តភ្នំចាស់) ស្ថិតនៅភូមិមនោរម្យ ឃុំហោងសំណំ ស្រុកឱរ៉ាល់ មានករណីហិង្សាដោយចេតនាបង្កឡេីងដោយក្មេងទំនើង ១ក្រុម មិនស្គាល់អត្តសញ្ញាណធ្វើសកម្មភាពដេញវាយគ្នាយ៉ាងអាណាធិបតេយ្យ កាប់បំផ្លាញម៉ូតូជនរងគ្រោះនាំគ្នាជិះម៉ូតូគេចខ្លួនបាត់អស់រួចមក។
កម្លាំងជំនាញនៃស្នងការនគរបាលខេត្តបានសហការគ្នាជាមួយកម្លាំងនគរបាលស្រុកឱរ៉ាលស្រាវជ្រាវ ឈានទៅកំណត់បានមុខសញ្ញាពាក់ព័ន្ធ ដេីម្បីចំណាត់ការនីតិវិធីបន្ដ។ ជាក់ស្ដែងកម្លាំងនគរបាលព្រហ្មទណ្ឌបានសហការជាមួយអធិការដ្ឋាននគរបាលស្រុកឱរ៉ាល់ ស្រុកសំរោងទង ស្រុកភ្នំស្រួច ស្រាវជ្រាវរហូតកំណត់មុខសញ្ញាសង្ស័យបាន ចំនួន ១០ នាក់
នៅថ្ងៃទី១៥. ១៦ ខែតុលា ឆ្នាំ២០២៣កំលាំងបានឃាត់ខ្លួនជនសង្ស័យចំនួន៣នាក់ក្នុងចំណោមបក្ខពួក ជាច្រើននាក់ មានឈ្មោះដូចខាងក្រោម៖
១. ឡន ប្រាក់វីត ប្រុស ១៦ឆ្នាំ ភូមិជើងក្តី ឃុំធម្មតាអរ ស្រុកសំរោងទង ជាអ្នកធ្វើសកម្មភាពយកមួកកូបគប់និងវាយបំបែកកាបាំងម៉ូតូជនរងគ្រោះ
២. សេង ចាន់ ហៅតឿ ប្រុស ១៨ឆ្នាំ នៅភូមិតាំងស្នោរ ឃុំទំព័រមាស ស្រុកសំរោងទង ។
៣. ពេជ្រ កក្កដា ប្រុស ១៦ឆ្នាំ នៅភូមិឡ ឃុំកាហែង ស្រុកសំរោងទង អ្នកធ្វើសកម្មភាពជិះម៉ូតូបំបុកម៉ូតូជនរងគ្រោះ។
យោងតាមចម្លេីយជនសង្ស័យបានប្រាប់ថាបក្ខពួករបស់ខ្លួនមានច្រេីនប៉ុន្តែដោយសារតែឃេីញព័ត៌មានតាមបណ្ដាញសង្គម tik tok បានរត់គេចខ្លួនពួនសម្ងំលាក់ខ្លួនពីការតាមចាប់របស់សមត្ថកិច្ច ក្នុងនោះរួមមានចំនួន ៧នាក់:
១. ឌី សំណាង ប្រុស ១៦ឆ្នាំ ភូមិស្លែង ឃុំមហាសាំង ស្រុកភ្នំស្រួច ជាអ្នកកាន់កាបិតផ្គាក់ កាប់ទៅលើម៉ូតូជនរងគ្រោះ
២. សុខ រិទ្ធិ ប្រុស ១៦ឆ្នាំ ភូមិក្រាំង ឃុំធម្មតាអរ ស្រុកសំរោងទង ជាអ្នកយកមួកសុវត្ថិភាពវាយកាបាំង និងគាស់យកផ្លាកលេខម៉ូតូរបស់ជនរងគ្រោះ
៣. ជា អ៊ីជិញ ហៅ ជិញ ប្រុស ១៨ឆ្នាំ ភូមិជើងភ្នំ ឃុំធម្មតាអរ ស្រុកសំរោង អ្នកបេីកម៉ូតូ ដឹកឈ្មោះ ឌី សំណាង កាន់កាំបិតផ្គាក់កាប់ម៉ូតូ
៤. វណ្ណា ប្រុស ១៦ឆ្នាំ ភូមិឡ ឃុំកាហែង ស្រុកសំរោងទង អ្នកយកមួកកូបគប់ត្រូវក្បាលជនរងគ្រោះបណ្ដាលឱ្យរងរបួសក្បាល
៥. ផុន ផាណាល់ ហៅ តឿ ប្រុស ១៦ឆ្នាំ ភូមិពង្រ ឃុំធម្មតាអរ ស្រុកសំរោងទង ជាអ្នកយកខ្សែរក្រវ៉ាវាយជនរងគ្រោះ រងរបួសខ្នង ។
៦. នី ប្រុស ១៥ឆ្នាំ ភូមិត្រពាំងអោប ឃុំមហាសាំង ស្រុកភ្នំស្រួច អ្នកជិះម៉ូតូរោទ៍សម្លេងបំពង ក្នុងបរិវេណវត្ត និងបានដុតផាវគ្រាប់បែកគប់ទៅលើជនរងគ្រោះ ។
៧. វីត ប្រុស ១៦ឆ្នាំ ភូមិជេីងក្តី ឃុំធម្មតាអរ ស្រុកសំរោងទង(គេចខ្លួន)។
បច្ចុប្បន្នសមត្ថកិច្ចបានកសាងសំណុំរឿងបញ្ជូនទៅតុលាការ ចំណាត់ការតាមនីតិវិធីបន្ដ រីឯបក្ខពួកសេសសល់ជំនាញបន្ដសហការស្រាវជ្រាវនិងស្នេីសុំដីកាតុលាការតាមប្រមាញ់យកមកផ្ដន្ទាទោសតាមច្បាប់ ៕
ដោយ៖ ស សម
