សារព័ត៌មាន នគរវត្ត តែងតែនាំមុខគេជានិច្ច
ការិយាល័យរបស់នាយករដ្ឋមន្ត្រីអុីស្រាអែល Benjamin Netanyahu បាននិយាយកាលពីថ្ងៃទី 20 ខែតុលាថា ក្រុមហាម៉ាស៉បានដោះលែងចំណាប់ខ្មាំងជនជាតិអាមេរិកពីរនាក់ដែលត្រូវបានចាប់ខ្លួននៅក្នុងការវាយប្រហារកាលពីថ្ងៃទី ៧ ខែតុលា។
ម្តាយនិងកូនស្រីជនជាតិអាមេរិកាំង Judith Tai Raanan និង Natalie Shoshana Raanan ត្រូវបានគេនាំចេញពីការតាំងទីលំនៅ Nahal Oz ជិតព្រំដែន Gaza ទៅកាន់មូលដ្ឋានយោធាមួយនៅកណ្តាលប្រទេសអុីស្រាអែល។
យោងតាមប្រព័ន្ធផ្សព្វផ្សាយអាមេរិក ម្តាយនិងកូនស្រីនេះមកពី Evanston ជាយក្រុង Chicago រដ្ឋ Illinois – សហរដ្ឋអាមេរិក។ ពួកគេត្រូវបានចាប់ខ្លួនខណៈពេលទៅលេងក្រុមគ្រួសារនៅជិតព្រំដែនជាមួយតំបន់ហ្គាហ្សា។
ពួកគេជាចំណាប់ខ្មាំងដំបូងគេដែលត្រូវបានដោះលែងក្នុងចំណោមមនុស្សប្រហែល ២០០ នាក់ដែលក្រុមហាម៉ាស់ចាប់ខ្លួន។ លោក Abu Ubaida អ្នកនាំពាក្យកងកម្លាំងប្រដាប់អាវុធនៃក្រុម Hamas បាននិយាយថា ចំណាប់ខ្មាំងត្រូវបានដោះលែងជាការឆ្លើយតបទៅនឹងកិច្ចខិតខំប្រឹងប្រែងសម្របសម្រួលរបស់ប្រទេសកាតារសម្រាប់ហេតុផលមនុស្សធម៌ និងដើម្បីបង្ហាញដល់ប្រជាជនអាមេរិកនិងពិភពលោកថា សេចក្តីថ្លែងការណ៍ត្រូវបានធ្វើឡើងដោយប្រធានាធិបតី Joe Biden និងការគ្រប់គ្រងរបស់គាត់គឺមិនពិត និងគ្មានមូលដ្ឋាន។
ប្រភពជិតស្និទ្ធនឹងការចរចាបាននិយាយថា ការដោះលែងជនជាតិអាមេរិកទាំងពីរគឺជាជំហានដំបូង ហើយការពិភាក្សាកំពុងបន្តដើម្បីឱ្យមានការដោះលែងបន្ថែមទៀត។
រដ្ឋមន្ត្រីការបរទេសអាមេរិក លោក Antony Blinken បាននិយាយថា ក្រុមការងារមកពីស្ថានទូតអាមេរិក ប្រចាំប្រទេសអុីស្រាអែលនឹងជួបគ្នាម្តងទៀតក្នុងពេលឆាប់ៗនេះ ជាមួយនឹងពលរដ្ឋអាមេរិកទាំងពីរនាក់ដែលត្រូវបានដោះលែង។ លោកបាននិយាយថា នៅមានជនជាតិអាមេរិក ១០ នាក់ទៀតដែលមិនត្រូវបានរកឃើញបន្ទាប់ពីការវាយប្រហារថ្ងៃទី ៧ ខែតុលា។
ប្រធានាធិបតីអាមេរិក Joe Biden បានថ្លែងអំណរគុណដល់អុីស្រាអែល និងកាតារសម្រាប់កិច្ចសហប្រតិបត្តិការរបស់ពួកគេ៕ ដោយ៖ ធីរីណា
រូបថត៖ Reuters
